udhar ko dekha tumhin ko dekha idhar ko dekha tumhin ko dekha

udhar ko dekhā tumhīñ ko dekhā idhar ko dekhā tumhīñ ko dekhā

ye shakl āñkhoñ meñ bas ga.ī hai jidhar ko dekhā tumhīñ ko dekhā

haram bhī hai ik makāñ tumhārā tumhīñ se ābād dair bhī hai

yahāñ bhī tum ho vahāñ bhī tum ho jidhar ko dekhā tumhīñ ko dekhā

agarche shakleñ to aur bhī haiñ sabhoñ meñ haiñ shān-e-dil-rubā.ī

tumhārī tasvīr hai to ye hai bashar ko dekhā tumhīñ ko dekhā

malak ne dekhā jo mustafā ko to aadmī kī khulī haqīqat

sabhoñ ne kī arz apne rab se bashar ko dekhā tumhīñ ko dekhā

tumhāre aariz kā hai ye partav tumhāre ruḳh kā hai is meñ jalva

falak par ai rashk-e-māh jis ne qamar ko dekhā tumhīñ ko dekhā

tumhāre hoñToñ kā rañg us meñ tumhāre dāñtoñ kī aab us meñ

jo la.al dekhā tumhīñ ko dekhā guhar ko dekhā tumhīñ ko dekhā

tumhāre tīroñ ke zaḳhm un meñ tumhārī sūrat dikhā rahe haiñ

jo dil ko dekhā tumhīñ ko dekhā jigar ko dekhā tumhīñ ko dekhā

ġhulāmī-e-shāh-e-dīñ ne 'akbar' banā diyā āftāb tum ko

tumhāre hī dam kī raushnī hai jidhar ko dekhā tumhīñ ko dekhā

udhar ko dekha tumhin ko dekha idhar ko dekha tumhin ko dekha

ye shakl aankhon mein bas gai hai jidhar ko dekha tumhin ko dekha

haram bhi hai ek makan tumhaara tumhin se aabaad dair bhi hai

yahan bhi tum ho wahan bhi tum ho jidhar ko dekha tumhin ko dekha

agarche shaklen to aur bhi hain sabhon mein hain shan-e-dil-rubai

tumhaari taswir hai to ye hai bashar ko dekha tumhin ko dekha

malak ne dekha jo mustafa ko to aadmi ki khuli haqiqat

sabhon ne ki arz apne rab se bashar ko dekha tumhin ko dekha

tumhaare aariz ka hai ye partaw tumhaare ruKH ka hai is mein jalwa

falak par ai rashk-e-mah jis ne qamar ko dekha tumhin ko dekha

tumhaare honTon ka rang us mein tumhaare danton ki aab us mein

jo lal dekha tumhin ko dekha guhar ko dekha tumhin ko dekha

tumhaare tiron ke zaKHm un mein tumhaari surat dikha rahe hain

jo dil ko dekha tumhin ko dekha jigar ko dekha tumhin ko dekha

ghulami-e-shah-e-din ne 'akbar' bana diya aaftab tum ko

tumhaare hi dam ki raushni hai jidhar ko dekha tumhin ko dekha