ادھر کو دیکھا تمہیں کو دیکھا ادھر کو دیکھا تمہیں کو دیکھا

ادھر کو دیکھا تمہیں کو دیکھا ادھر کو دیکھا تمہیں کو دیکھا

یہ شکل آنکھوں میں بس گئی ہے جدھر کو دیکھا تمہیں کو دیکھا

حرم بھی ہے اک مکاں تمہارا تمہیں سے آباد دیر بھی ہے

یہاں بھی تم ہو وہاں بھی تم ہو جدھر کو دیکھا تمہیں کو دیکھا

اگرچہ شکلیں تو اور بھی ہیں سبھوں میں ہیں شان دلربائی

تمہاری تصویر ہے تو یہ ہے بشر کو دیکھا تمہیں کو دیکھا

ملک نے دیکھا جو مصطفیٰؐ کو تو آدمی کی کھلی حقیقت

سبھوں نے کی عرض اپنے رب سے بشر کو دیکھا تمہیں کو دیکھا

تمہارے عارض کا ہے یہ پرتو تمہارے رخ کا ہے اس میں جلوہ

فلک پر اے رشک ماہ جس نے قمر کو دیکھا تمہیں کو دیکھا

تمہارے ہونٹوں کا رنگ اس میں تمہارے دانتوں کی آب اس میں

جو لعل دیکھا تمہیں کو دیکھا گہر کو دیکھا تمہیں کو دیکھا

تمہارے تیروں کے زخم ان میں تمہاری صورت دکھا رہے ہیں

جو دل کو دیکھا تمہیں کو دیکھا جگر کو دیکھا تمہیں کو دیکھا

غلامیٔ شاہ دیں نے اکبرؔ بنا دیا آفتاب تم کو

تمہارے ہی دم کی روشنی ہے جدھر کو دیکھا تمہیں کو دیکھا