un ke andaz-e-karam un pe wo aana dil ka

un ke andāz-e-karam un pe vo aanā dil kā

haaye vo vaqt vo bāteñ vo zamāna dil kā

na sunā us ne tavajjoh se fasānā dil kā

zindagī guzrī magar dard na jaanā dil kā

kuchh na.ī baat nahīñ husn pe aanā dil kā

mashġhala hai ye nihāyat hī purānā dil kā

vo mohabbat kī shurūāt vo be-thāh ḳhushī

dekh kar un ko vo phūle na samānā dil kā

dil lagī dil kī lagī ban ke miTā detī hai

rog dushman ko bhī yārab na lagānā dil kā

ek to mere muqaddar ko bigāḌā us ne

aur phir us pe ġhazab hans ke banānā dil kā

mere pahlū meñ nahīñ aap kī muTThī meñ nahīñ

be-Thikāne hai bahut din se Thikānā dil kā

vo bhī apne na hue dil bhī gayā hāthoñ se

aise aane se to behtar thā na aanā dil kā

ḳhuub haiñ aap bahut kHuub magar yaad rahe

zeb detā nahīñ aisoñ ko satāna dil kā

be-jhijak aa ke milo hans ke milāo āñkheñ

aao ham tum ko sikhāte haiñ milānā dil kā

naqsh-e-bar aab nahīñ vahm nahīñ ḳhvāb nahīñ

aap kyuuñ khel samajhte haiñ miTānā dil kā

hasrateñ ḳhaak huiiñ miT ga.e armāñ saare

luT gayā khūcha-e-jānāñ meñ ḳhazānā dil kā

le chalā hai mire pahlū se ba-sad shauq koī

ab to mumkin nahīñ lauT ke aanā dil kā

un kī mahfil meñ 'nasīr' un ke tabassum kī qasam

dekhte rah ga.e ham haath se jaanā dil kā

un ke andaz-e-karam un pe wo aana dil ka

haye wo waqt wo baaten wo zamana dil ka

na suna us ne tawajjoh se fasana dil ka

zindagi guzri magar dard na jaana dil ka

kuchh nai baat nahin husn pe aana dil ka

mashghala hai ye nihayat hi purana dil ka

wo mohabbat ki shuruat wo be-thah KHushi

dekh kar un ko wo phule na samana dil ka

dil lagi dil ki lagi ban ke miTa deti hai

rog dushman ko bhi yarab na lagana dil ka

ek to mere muqaddar ko bigaDa us ne

aur phir us pe ghazab hans ke banana dil ka

mere pahlu mein nahin aap ki muTThi mein nahin

be-Thikane hai bahut din se Thikana dil ka

wo bhi apne na hue dil bhi gaya hathon se

aise aane se to behtar tha na aana dil ka

KHub hain aap bahut kHub magar yaad rahe

zeb deta nahin aison ko satana dil ka

be-jhijak aa ke milo hans ke milao aankhen

aao hum tum ko sikhate hain milana dil ka

naqsh-e-bar aab nahin wahm nahin KHwab nahin

aap kyun khel samajhte hain miTana dil ka

hasraten KHak huin miT gae arman sare

luT gaya khucha-e-jaanan mein KHazana dil ka

le chala hai mere pahlu se ba-sad shauq koi

ab to mumkin nahin lauT ke aana dil ka

un ki mahfil mein 'nasir' un ke tabassum ki qasam

dekhte rah gae hum hath se jaana dil ka