unka ho kar KHud unhen apna bana sakta hun main

unkā ho kar ḳhud unheñ apnā banā sakta huuñ maiñ

kho diyā sab kuchh to phir sab kuchh hī pā sakta huuñ maiñ

apne dushman ko bhī siine se lagā sakta huuñ maiñ

aap kī ḳhātir ye zahmat bhī uThā sakta huuñ maiñ

hote hote ho ga.ī hāsil mujhe fahm-e-sitam

aap ke har jaur par ab muskurā sakta huuñ maiñ

pī bhī luuñ aañsū to āḳhir rañg-e-ruḳh ko kyā karūñ

soz-e-ġham ko kyā kisī unvāñ chhupā sakta huuñ maiñ

rāzdārī merā sheva pardā-dārī merā kaam

raaz kī bāteñ kisī ko kyā batā sakta huuñ maiñ

ishq par takiya to hai ḳhud-e'timādī kī dalīl

husn-e-sarkash ko bhī kyā apnā banā sakta huuñ maiñ

tujh se itnī baḌh ga.ī hai nisbat-e-vāriftagī

jis ko chāhūñ terā dīvāna banā sakta huuñ maiñ

be-irāda kuchh Tapak paḌte haiñ aañsū bhī vahāñ

zindagī kī jis ravish par muskurā sakta huuñ maiñ

ḳhāna-e-dil meñ utar aatī hai jis kī har nazar

us se apne dil ke goshe kyā chhupā sakta huuñ maiñ

jis do-rāhe par bhī mujh ko chhoḌ de zauq-e-talab

unkā dāman thaam kar manzil ko pā sakta huuñ maiñ

ātish-e-ġham kis ke bas kī hai jo mere bas kī ho

aur bhaḌkā luuñ agar us ko bujhā sakta huuñ maiñ

ye ġhurūr-e-bandagī hai un se nisbat ke tufail

ye salāmat hai to har baazī lagā sakta huuñ maiñ

tum mire rone pe hañste ho ḳhudā hañstā rakhe

ye bhī kyā kam hai ki ro kar to hañsā sakta huuñ maiñ

soz-e-dil ḳhud mustaqil daulat hai 'kāmil' ishq kī

apne ham-chashmoñ se āñkheñ to milā sakta huuñ maiñ

unka ho kar KHud unhen apna bana sakta hun main

kho diya sab kuchh to phir sab kuchh hi pa sakta hun main

apne dushman ko bhi sine se laga sakta hun main

aap ki KHatir ye zahmat bhi uTha sakta hun main

hote hote ho gai hasil mujhe fahm-e-sitam

aap ke har jaur par ab muskura sakta hun main

pi bhi lun aansu to aaKHir rang-e-ruKH ko kya karun

soz-e-gham ko kya kisi unwan chhupa sakta hun main

raazdari mera shewa parda-dari mera kaam

raaz ki baaten kisi ko kya bata sakta hun main

ishq par takiya to hai KHud-e'timadi ki dalil

husn-e-sarkash ko bhi kya apna bana sakta hun main

tujh se itni baDh gai hai nisbat-e-wariftagi

jis ko chahun tera diwana bana sakta hun main

be-irada kuchh Tapak paDte hain aansu bhi wahan

zindagi ki jis rawish par muskura sakta hun main

KHana-e-dil mein utar aati hai jis ki har nazar

us se apne dil ke goshe kya chhupa sakta hun main

jis do-rahe par bhi mujh ko chhoD de zauq-e-talab

unka daman tham kar manzil ko pa sakta hun main

aatish-e-gham kis ke bas ki hai jo mere bas ki ho

aur bhaDka lun agar us ko bujha sakta hun main

ye ghurur-e-bandagi hai un se nisbat ke tufail

ye salamat hai to har bazi laga sakta hun main

tum mere rone pe hanste ho KHuda hansta rakhe

ye bhi kya kam hai ki ro kar to hansa sakta hun main

soz-e-dil KHud mustaqil daulat hai 'kaamil' ishq ki

apne ham-chashmon se aankhen to mila sakta hun main