aa gaya yun mere honTon pe tera nam ki bas

aa gayā yuuñ mere hoñToñ pe terā naam ki bas

vo charāġhāñ kiyā āñkhoñ ne sar-e-shām ki bas

yaad kyā jaane vo kaun sī baat aa.ī hai

dil ne phir aaj uThāyā hai vo kohrām ki bas

ik damaktā huā taarā sar-e-mizhgāñ aayā

us ne āñkhoñ se diyā thā koī paiġhām ki bas

ham bhī sunte haiñ ki nāzāñ haiñ bahut husn pe chāñd

ik nazar dekh to le tujh ko lage baam ki bas

saañs lenā bhī 'safī' bā'is-e-āzār huā

vo lage dil pe tere hijr meñ ilzām ki bas

aa gaya yun mere honTon pe tera nam ki bas

wo charaghan kiya aankhon ne sar-e-sham ki bas

yaad kya jaane wo kaun si baat aai hai

dil ne phir aaj uThaya hai wo kohram ki bas

ek damakta hua tara sar-e-mizhgan aaya

us ne aankhon se diya tha koi paigham ki bas

hum bhi sunte hain ki nazan hain bahut husn pe chand

ek nazar dekh to le tujh ko lage baam ki bas

sans lena bhi 'safi' ba'is-e-azar hua

wo lage dil pe tere hijr mein ilzam ki bas