dil mein jigar mein aankh mein bas tu hi tu rahe

dil meñ jigar meñ aañkh meñ bas tū hī tū rahe

is ke sivā na aur koī aarzū rahe

hasrat yahī rahe aur yahī justujū rahe

nazreñ jidhar uThā.ūñ udhar tū hī tū rahe

is iltijā ke baa'd koī iltijā nahīñ

merā sanam hamesha mire rū-ba-rū rahe

is ehtimām-e-shauq se sajde adā karūñ

terā ḳhayāl aa.e to dil bā-vazū rahe

jannat mere nasīb kī vā'iz ko baḳhsh de

mere kafan meñ gesū-e-jānāñ kī bū rahe

terā ḳhayāl aur tirī justujū rahe

maiñ maiñ na rahūñ mujh meñ faqat tū hī tū rahe

rusvā na ho ġhulām terā roz-e-hashr meñ

bas itnā chāhtā huuñ mirī aabrū rahe

kāmil ko aaj kāmil-e-īmāñ banā de tū

ye zindagī rahe na rahe aabrū rahe

dil mein jigar mein aankh mein bas tu hi tu rahe

is ke siwa na aur koi aarzu rahe

hasrat yahi rahe aur yahi justuju rahe

nazren jidhar uThaun udhar tu hi tu rahe

is iltija ke ba'd koi iltija nahin

mera sanam hamesha mere ru-ba-ru rahe

is ehtimam-e-shauq se sajde ada karun

tera KHayal aae to dil ba-wazu rahe

jannat mere nasib ki wa'iz ko baKHsh de

mere kafan mein gesu-e-jaanan ki bu rahe

tera KHayal aur teri justuju rahe

main main na rahun mujh mein faqat tu hi tu rahe

ruswa na ho ghulam tera roz-e-hashr mein

bas itna chahta hun meri aabru rahe

kaamil ko aaj kaamil-e-iman bana de tu

ye zindagi rahe na rahe aabru rahe