talwar KHun mein rang lo arman rah na jae

talvār ḳhuuñ meñ rañg lo armān rah na jaa.e

bismil ke sar pe koī ehsān rah na jaa.e

vā'da kiyā thā ai dil aane kā aaj us ne

ārā.ishoñ kā koī sāmān rah na jaa.e

bhar-bhar ke jaam de ab ham mai-kashoñ ko saaqī

mahfil meñ koī pyāsā mehmān rah na jaa.e

lillāh is meñ aa kar tum apnā ghar banā lo

dil ḳhāna-e-ḳhudā hai vīrān rah na jaa.e

lillāh apne ghar se dushman ko tum nikālo

firdaus ke chaman meñ shaitān rah na jaa.e

ab qatl kar chuke to pāmāl-e-lāsh kar do

ye bhī tumhāre dil meñ armān rah na jaa.e

vo teġh le ke aa.e chal sar ke bal 'nizāmī'

ulfat kā ma.arka hai maidān rah na jaa.e

talwar KHun mein rang lo arman rah na jae

bismil ke sar pe koi ehsan rah na jae

wa'da kiya tha ai dil aane ka aaj us ne

aaraishon ka koi saman rah na jae

bhar-bhar ke jam de ab hum mai-kashon ko saqi

mahfil mein koi pyasa mehman rah na jae

lillah is mein aa kar tum apna ghar bana lo

dil KHana-e-KHuda hai viran rah na jae

lillah apne ghar se dushman ko tum nikalo

firdaus ke chaman mein shaitan rah na jae

ab qatl kar chuke to pamal-e-lash kar do

ye bhi tumhaare dil mein arman rah na jae

wo tegh le ke aae chal sar ke bal 'nizami'

ulfat ka marka hai maidan rah na jae