تلوار خوں میں رنگ لو ارمان رہ نہ جائے

تلوار خوں میں رنگ لو ارمان رہ نہ جائے

بسمل کے سر پہ کوئی احسان رہ نہ جائے

وعدہ کیا تھا اے دل آنے کا آج اس نے

آرائشوں کا کوئی سامان رہ نہ جائے

بھر بھر کے جام دے اب ہم میکشوں کو ساقی

محفل میں کوئی پیاسا مہمان رہ نہ جائے

لللہ اس میں آ کر تم اپنا گھر بنا لو

دل خانۂ خدا ہے ویران رہ نہ جائے

لللہ اپنے گھر سے دشمن کو تم نکالو

فردوس کے چمن میں شیطان رہ نہ جائے

اب قتل کر چکے تو پامال لاش کر دو

یہ بھی تمہارے دل میں ارمان رہ نہ جائے

وہ تیغ لے کے آئے چل سر کے بل نظامیؔ

الفت کا معرکہ ہے میدان رہ نہ جائے