jo banda-e-jaan-e-jaanan hai to jaan jaane se kya matlab

jo banda-e-jān-e-jānāñ hai to jaan jaane se kyā matlab

jo mahv-e-rū-e-jānā hai to hosh aane se kyā matlab

talab jis kī hai vo jaanī bhī hai nazdīk-tar tujh se

na paayā aap ko tuune use paane se kyā matlab

qadam yaañ bul-havas mat rakh ki jāñ-bāzoñ kā kūcha hai

bhalā ahl-e-havas ko sar ke kaTvā ne se kyā matlab

tumhār kushtagān-e-ġham ko ġham khāne kā kyuuñ ġham ho

vo jin ko de chale pahle to mar jaane se kyā matlab

tire dam bharne vaale bhī kahīñ Darte haiñ marne se

fanā ho kar hue baaqī to mar jaane se kyā matlab

talāsh-e-kū-e-jānāñ hai to gum kar aap ko pahle

ba-juz gum-gashtagī ke tujh ko pā jaane se kyā matlab

tirā gum-gashta ulfat jo gum hī ho chukā tujh meñ

nishān us kā jo Thahrā hai use paane se kyā matlab

usī ne ḳhair-o-shar donoñ samajh kar jab banā.e haiñ

hamīñ us ke burā jaane bhalā jaane se kyā matlab

na the ham aur ab ham haiñ na hoñge ek din ham bhī

na samjhe apnā matlab ham to samjhāne se kyā matlab

nahīñ kuchh ham se ho saktā haiñ apne aap darmāñda

to us sūrat se ham ko phir ḳhudā jaane se kyā matlab

'ḳhalīl'-e-ḳhasta kis ne kis kā aadam naam rakhā hai

bhalā is sirr-e-maḳhfī ko batā jaane se kyā matlab

jo banda-e-jaan-e-jaanan hai to jaan jaane se kya matlab

jo mahw-e-ru-e-jaana hai to hosh aane se kya matlab

talab jis ki hai wo jaani bhi hai nazdik-tar tujh se

na paya aap ko tune use pane se kya matlab

qadam yan bul-hawas mat rakh ki jaan-bazon ka kucha hai

bhala ahl-e-hawas ko sar ke kaTwa ne se kya matlab

tumhaar kushtagan-e-gham ko gham khane ka kyun gham ho

wo jin ko de chale pahle to mar jaane se kya matlab

tere dam bharne wale bhi kahin Darte hain marne se

fana ho kar hue baqi to mar jaane se kya matlab

talash-e-ku-e-jaanan hai to gum kar aap ko pahle

ba-juz gum-gashtagi ke tujh ko pa jaane se kya matlab

tera gum-gashta ulfat jo gum hi ho chuka tujh mein

nishan us ka jo Thahra hai use pane se kya matlab

usi ne KHair-o-shar donon samajh kar jab banae hain

hamin us ke bura jaane bhala jaane se kya matlab

na the hum aur ab hum hain na honge ek din hum bhi

na samjhe apna matlab hum to samjhane se kya matlab

nahin kuchh hum se ho sakta hain apne aap darmanda

to us surat se hum ko phir KHuda jaane se kya matlab

'KHalil'-e-KHasta kis ne kis ka aadam nam rakha hai

bhala is sirr-e-maKHfi ko bata jaane se kya matlab