hue judai se teri be-KHud tujhe hamara KHayal kya hai

hue judā.ī se terī be-ḳhud tujhe hamārā ḳhayāl kyā hai

usī tamannā meñ miT ga.e ham kabhī na pūchhā ki haal kyā hai

mujhe jo āzurda dekhā ik din to ye tabassum se bolā kam-sin

kareñge puurā jo hogā mumkin batā de terā savāl kyā hai

kahā jo maiñ ne ki haaye zālim marā maiñ furqat meñ tere us dam

to bolā martā hai ek 'ālam tumhīñ mare to kamāl kyā hai

qarār dekhā na bahr-o-bar ko zavāl hai shams aur qamar ko

ye fikr hai har malak bashar ko falak sitamgar kī chaal kyā hai

na 'aql aisī na hosh aisā na kaam apnā suḳhanvarī kā

vo dast-e-qudrat se likh rahā hai asar tumhārī majāl kyā hai

hue judai se teri be-KHud tujhe hamara KHayal kya hai

usi tamanna mein miT gae hum kabhi na puchha ki haal kya hai

mujhe jo aazurda dekha ek din to ye tabassum se bola kam-sin

karenge pura jo hoga mumkin bata de tera sawal kya hai

kaha jo main ne ki haye zalim mara main furqat mein tere us dam

to bola marta hai ek 'alam tumhin mare to kamal kya hai

qarar dekha na bahr-o-bar ko zawal hai shams aur qamar ko

ye fikr hai har malak bashar ko falak sitamgar ki chaal kya hai

na 'aql aisi na hosh aisa na kaam apna suKHanwari ka

wo dast-e-qudrat se likh raha hai asar tumhaari majal kya hai