ruKH par nur se jab kakul-e-mushkin uThaenge

ruḳh par nuur se jab kākul-e-mushkīñ uThā.eñge

barhaman toḌ kar zunnār ko īmān lā.eñge

tamāshā hogā jis din vo naqāb-e-ruḳh uThā.eñge

numūd-e-shahr hogī ek 'ālam ko hilā.eñge

lab-e-jāñ-baḳhsh ko gar bhuul kar bhī vo hilā.eñge

masīhā.ī kareñge saikḌoñ murde jalā.eñge

ḳham-e-abru ko ham mehrāb samjheñ haiñ ki muddat se

ziyārat karne ham kā'ba ke but-ḳhāna ko mil jā.eñge

shahīd-e-karbalā-e-nāz se hogī hameñ ḳhajlat

kabhī tīr-e-nigāh se ham jo pahlū ko bachā.eñge

kareñ kyā jām-e-mai kī iltijā bāda-faroshoñ se

murādeñ apne dil kī sāqī-e-kausar se pā.eñge

rahe gar zindagī ai 'ashrafī' thoḌī zamāne meñ

dar-e-ashraf pe jākar apnā ham maskan banā.eñge

ruKH par nur se jab kakul-e-mushkin uThaenge

barhaman toD kar zunnar ko iman laenge

tamasha hoga jis din wo naqab-e-ruKH uThaenge

numud-e-shahr hogi ek 'alam ko hilaenge

lab-e-jaan-baKHsh ko gar bhul kar bhi wo hilaenge

masihai karenge saikDon murde jalaenge

KHam-e-abru ko hum mehrab samjhen hain ki muddat se

ziyarat karne hum ka'ba ke but-KHana ko mil jaenge

shahid-e-karbala-e-naz se hogi hamein KHajlat

kabhi tir-e-nigah se hum jo pahlu ko bachaenge

karen kya jam-e-mai ki iltija baada-faroshon se

muraden apne dil ki saqi-e-kausar se paenge

rahe gar zindagi ai 'ashrafi' thoDi zamane mein

dar-e-ashraf pe jakar apna hum maskan banaenge