mast-e-alast saqi mujhko bana raha hai

mast-e-alast saaqī mujh ko banā rahā hai

kaif-e-sharāb-e-ulfat āñkhoñ meñ aa rahā hai

āñkheñ milā-milā kar be-ḳhud banā rahā hai

vo mast-e-nāz mujh ko piyāla pilā rahā hai

josh-e-bahār hai phir kaalī ghaTā ke sadqe

zauq-e-sharāb mastī phir gudgudā rahā hai

chhan-chhan ke nuur us kā phailā hai sab jahāñ meñ

parde meñ baiTh kar vo jalva dikhā rahā hai

zabt-e-darūñ ne jaise bhaḌkā diye haiñ sho’le

ghuT ghaT ke ġham se naala dil ko jilā rahā hai

har rañg meñ nihāñ hai har shakl meñ ayaañ hai

āñkhoñ meñ bas rahā hai dil meñ samā rahā hai

vo zār-o-nā-tavāñ hai bīmār-e-ġham ilāhī

har saañs chuTkiyoñ meñ tan ko uḌā rahā hai

uljhan meñ paḌ gayā hai dil chāk-chāk ho kar

shāna se aaj koī zulfeñ banā rahā hai

kis ne dikhā diyā hai yā-rab jamāl apnā

kyuuñ aaj shakl-e-mūsā ġhash mujh ko aa rahā hai

marqad meñ so rahe haiñ haare thake hue ham

kyuuñ aaj shor-e-mahshar ham ko jagā rahā hai

de-de ke rañj 'raunaq' us 'ishq ne miTāyā

āġhāz kyā rahā thā anjām kyā rahā hai

mast-e-alast saqi mujh ko bana raha hai

kaif-e-sharab-e-ulfat aankhon mein aa raha hai

aankhen mila-mila kar be-KHud bana raha hai

wo mast-e-naz mujh ko piyala pila raha hai

josh-e-bahaar hai phir kali ghaTa ke sadqe

zauq-e-sharab masti phir gudguda raha hai

chhan-chhan ke nur us ka phaila hai sab jahan mein

parde mein baiTh kar wo jalwa dikha raha hai

zabt-e-darun ne jaise bhaDka diye hain sho’le

ghuT ghaT ke gham se nala dil ko jila raha hai

har rang mein nihan hai har shakl mein ayan hai

aankhon mein bas raha hai dil mein sama raha hai

wo zar-o-na-tawan hai bimar-e-gham ilahi

har sans chuTkiyon mein tan ko uDa raha hai

uljhan mein paD gaya hai dil chaak-chaak ho kar

shana se aaj koi zulfen bana raha hai

kis ne dikha diya hai ya-rab jamal apna

kyun aaj shakl-e-musa ghash mujh ko aa raha hai

marqad mein so rahe hain haare thake hue hum

kyun aaj shor-e-mahshar hum ko jaga raha hai

de-de ke ranj 'raunaq' us 'ishq ne miTaya

aaghaz kya raha tha anjam kya raha hai