phira zamana mein chaar jaanib sanam sarapa tumhin ko dekha

phirā zamāna meñ chaar jānib sanam sarāpā tumhīñ ko dekhā

hasīn dekhe jamīl dekhe par ek tum sā tumhīñ ko dekhā

hazāroñ e'jāz har suḳhan meñ yagāna har ek bāñkpan meñ

har ik adā meñ har ik fan meñ nayā nirālā tumhīñ to dekhā

na dekhā mahbūb koī aisā ki 'āshiqoñ par ho mahv-o-shaidā

na ḳhud-numā ho na be-vafā ho na.ī sifat kā tumhīñ ko dekhā

jo māñgā maiñ ne diyā vo tum ne kahā jo maiñ ne kiyā vo tum ne

kahūñ na gar jhuuT sach to ye jahāñ meñ sachchā tumhīñ ko dekhā

agarche is gulshan-e-jahāñ meñ hazāroñ gul haiñ ba-rañg-e-dīgar

magar ba-kHushbū-e-rūh-parvar sadā mahaktā tumheñ ko dekhā

phira zamana mein chaar jaanib sanam sarapa tumhin ko dekha

hasin dekhe jamil dekhe par ek tum sa tumhin ko dekha

hazaron e'jaz har suKHan mein yagana har ek bankpan mein

har ek ada mein har ek fan mein naya nirala tumhin to dekha

na dekha mahbub koi aisa ki 'ashiqon par ho mahw-o-shaida

na KHud-numa ho na be-wafa ho nai sifat ka tumhin ko dekha

jo manga main ne diya wo tum ne kaha jo main ne kiya wo tum ne

kahun na gar jhuT sach to ye jahan mein sachcha tumhin ko dekha

agarche is gulshan-e-jahan mein hazaron gul hain ba-rang-e-digar

magar ba-kHushbu-e-ruh-parwar sada mahakta tumhein ko dekha