dil-o-dil mein phir aan-ban wale

dil-o-dil meñ phir ān-bān vaale

sikke biThā rahe haiñ nām-o-nishān vaale

tiir nazar se terī abr-o-kamān vaale

bachte nahīñ kabūtar ūñchī uḌaan vaale

āsāñ na qatl hoñge ham saḳht jaan vaale

beḌā na tū uThānā o dhān-pān vaale

maiñ aur sabr merā aafat nasīb donoñ

ek teġh ek qātil do imtihān vaale

uThtī javāniyoñ par bohtān bāñdh kar bhī

mahram burī na Thahre achchhī uThān vaale

kab tak raheñ sambhāle sar par hamāre naale

apnā zamīn uThā le e āsmān vaale

ham be-zabān haiñ goyā kahte nahīñ kuchh un ko

muñh aa.eñ kyuuñ na dushman TeḌhī zabān vaale

shīrīnī suḳhan kī gar chāshnī yahī hai

phīke paḌeñge 'nāzim' ūñchī dukān vaale

dil-o-dil mein phir aan-ban wale

sikke biTha rahe hain nam-o-nishan wale

tir nazar se teri abr-o-kaman wale

bachte nahin kabutar unchi uDan wale

aasan na qatl honge hum saKHt jaan wale

beDa na tu uThana o dhan-pan wale

main aur sabr mera aafat nasib donon

ek tegh ek qatil do imtihan wale

uThti jawaniyon par bohtan bandh kar bhi

mahram buri na Thahre achchhi uThan wale

kab tak rahen sambhaale sar par hamare nale

apna zamin uTha le e aasman wale

hum be-zaban hain goya kahte nahin kuchh un ko

munh aaen kyun na dushman TeDhi zaban wale

shirini suKHan ki gar chashni yahi hai

phike paDenge 'nazim' unchi dukan wale