ishq sanam se ho gaya uske asar kya kahun

'ishq sanam se ho gayā us ke asar kyā kahūñ

banda huuñ terā ai ḳhudā husn-e-bashar ko kyā kahūñ

dair-o-haram meñ raushnī shams-o-qamar se hai to kyā

mujh ko to tum pasand ho dard-e-jigar ko kyā kahūñ

pahlū se uTh ga.e haiñ vo dil merā māntā nahīñ

sabr-o-qarār kaise ho dard-e-jigar kyā kahūñ

qāsid laayā kyā ḳhabar jab maiñ jahāñ se uTh gayā

laayā ḳhabar to kyā ḳhabar aisī ḳhabar ko kyā kahūñ

vā'da-e-vasl kar ke aap jaate ho jā.iye magar

ye to batlā.īye bhalā dard-e-jigar ko kyā kahūñ

saare jahāñ ke ḳhūb-rū terī qasam tere sivā

mujh ko nahīñ koī pasand apnī nazar ko kyā kahūñ

sāqī-e-husn-e-māh-rū jaam vo sab ko de diyā

vasl kā vā'da abhī vaqt-e-sahar ko kyā kahūñ

'ishq sanam se ho gaya us ke asar kya kahun

banda hun tera ai KHuda husn-e-bashar ko kya kahun

dair-o-haram mein raushni shams-o-qamar se hai to kya

mujh ko to tum pasand ho dard-e-jigar ko kya kahun

pahlu se uTh gae hain wo dil mera manta nahin

sabr-o-qarar kaise ho dard-e-jigar kya kahun

qasid laya kya KHabar jab main jahan se uTh gaya

laya KHabar to kya KHabar aisi KHabar ko kya kahun

wa'da-e-wasl kar ke aap jate ho jaiye magar

ye to batlaiye bhala dard-e-jigar ko kya kahun

sare jahan ke KHub-ru teri qasam tere siwa

mujh ko nahin koi pasand apni nazar ko kya kahun

saqi-e-husn-e-mah-ru jam wo sab ko de diya

wasl ka wa'da abhi waqt-e-sahar ko kya kahun