kahan jaen tere bande pata paen kahan tera

kahāñ jaa.eñ tire bande patā paa.eñ kahāñ terā

talāsh-o-justujū se kuchh nahīñ miltā nishāñ terā

mirī āñkhoñ ne dekhā ho tirā jalva to haiñ kāfir

yahī dil tujh se vāqif hai yahī hai rāz-dāñ terā

shikasta dil ko maiñ apnī nihāyat dost rakhtā huuñ

sunā hai jab se ye TuuTā huā dil hai makāñ terā

barābar hukm jaarī hai terā duniyā meñ 'uqbā meñ

ki haiñ donoñ jahāñ tere yahāñ terā vahāñ terā

ḳhayāl-o-vahm kā tujh tak guzar ho ġhair mumkin hai

jise kahte haiñ sab 'arsh-e-barīñ hai āstāñ terā

qadam sābit rahe rāh-e-vafā meñ saḳht mushkil hai

farishtoñ ko Darā detā hai yā rab imtihāñ terā

haqīqat se nahīñ āgāh yuuñ kahne ko 'ārif huuñ

kahāñ ye martaba merā ki maiñ huuñ rāz-dāñ terā

kahan jaen tere bande pata paen kahan tera

talash-o-justuju se kuchh nahin milta nishan tera

meri aankhon ne dekha ho tera jalwa to hain kafir

yahi dil tujh se waqif hai yahi hai raaz-dan tera

shikasta dil ko main apni nihayat dost rakhta hun

suna hai jab se ye TuTa hua dil hai makan tera

barabar hukm jari hai tera duniya mein 'uqba mein

ki hain donon jahan tere yahan tera wahan tera

KHayal-o-wahm ka tujh tak guzar ho ghair mumkin hai

jise kahte hain sab 'arsh-e-barin hai aastan tera

qadam sabit rahe rah-e-wafa mein saKHt mushkil hai

farishton ko Dara deta hai ya rab imtihan tera

haqiqat se nahin aagah yun kahne ko 'arif hun

kahan ye martaba mera ki main hun raaz-dan tera