کہاں جائیں ترے بندے پتا پائیں کہاں تیرا

کہاں جائیں ترے بندے پتا پائیں کہاں تیرا

تلاش و جستجو سے کچھ نہیں ملتا نشاں تیرا

مری آنکھوں نے دیکھا ہو ترا جلوہ تو ہیں کافر

یہی دل تجھ سے واقف ہے یہی ہے رازداں تیرا

شکستہ دل کو میں اپنی نہایت دوست رکھتا ہوں

سنا ہے جب سے یہ ٹوٹا ہوا دل ہے مکاں تیرا

برابر حکم جاری ہے تیرا دنیا میں عقبیٰ میں

کہ ہیں دونوں جہاں تیرے یہاں تیرا وہاں تیرا

خیال و وہم کا تجھ تک گزر ہو غیر ممکن ہے

جسے کہتے ہیں سب عرش بریں ہے آستاں تیرا

قدم ثابت رہے راہ وفا میں سخت مشکل ہے

فرشتوں کو ڈرا دیتا ہے یا رب امتحاں تیرا

حقیقت سے نہیں آگاہ یوں کہنے کو عارف ہوں

کہاں یہ مرتبہ میرا کہ میں ہوں رازداں تیرا