sar mein sauda kis liye zulf-e-muambar rakh diya

sar meñ saudā kis liye zulf-e-mu'ambar rakh diyā

kyā balā hai bojh kaisā tū ne mujh par rakh diyā

muntazir huuñ maiñ qayāmat kā ilāhī bhej de

aaj va'ada vasl kā us but ne kal par rakh diyā

kyā gumāñ thā mere jī uThne kā bā'd-e-marg bhī

kyuuñ dobāra haq par zālim ne ḳhanjar rakh diyā

zulm se tauba na kar terī jafā meñ lutf hai

naam kyā jaane terā kis ne sitam-gar rakh diiyā

bā'd-e-murdan mil chukā hamdam Thikānā gor kā

vahshiyoñ ne ḳhaak ko merī havā par rakh diyā

gar rukāvaT kuchh na thī dil meñ mere jallād ke

kyuuñ uThā kar haath se zālam ne ḳhanjar rakh diyā

dekh kar vo mast chashm-e-nāz saaqī haath se

maiñ ne miinā rakh diyā miinā ne sāġhar rakh diyā

sar mein sauda kis liye zulf-e-mu'ambar rakh diya

kya bala hai bojh kaisa tu ne mujh par rakh diya

muntazir hun main qayamat ka ilahi bhej de

aaj wa'ada wasl ka us but ne kal par rakh diya

kya guman tha mere ji uThne ka ba'd-e-marg bhi

kyun dobara haq par zalim ne KHanjar rakh diya

zulm se tauba na kar teri jafa mein lutf hai

nam kya jaane tera kis ne sitam-gar rakh diya

ba'd-e-murdan mil chuka hamdam Thikana gor ka

wahshiyon ne KHak ko meri hawa par rakh diya

gar rukawaT kuchh na thi dil mein mere jallad ke

kyun uTha kar hath se zalam ne KHanjar rakh diya

dekh kar wo mast chashm-e-naz saqi hath se

main ne mina rakh diya mina ne saghar rakh diya