KHuda jaane mere dast-e-hawas ka kya irada hai

ḳhudā jaane mire dast-e-havas kā kyā irāda hai

shab-e-ḳhalvat jo yuuñ in kī taraf rah-rah ke baḌhtā hai

ġhazab hai mudda'ī merī tamannā kā vo ban baiThe

jise ye bhī nahīñ mā'lūm merā mudda'ā kyā hai

raqīboñ se tū miltā hai hamesha be-hijābāna

jo parda hai to us parda-nashīñ kā ham se paradā hai

javānī aane vaalī hai agar us shoḳh kam-sin kī

to is betāb ko bhī fikr-e-iz.hār-e-tamannā hai

Thahartā hī nahīñ is dūr-uftāda ke hāthoñ meñ

ḳhudā jaane ye ḳhat kis chulbule ne mujh ko likkhā hai

but-e-jādū bayāñ ne haaye pūchhā kis mohabbat se

mire vahshī batā tū kis parī kā tujh ko saudā hai

madad ai ārzū-e-dasht-paimā.ī ki zindāñ hai

salāsil toḌ kar apne ye vahshī ab nikaltā hai

karam ke baa'd andāz-e-sitam hargiz nahīñ zebā

hamārā āshnā nā-āshnā kāheko bantā hai

tire bāñke jo un ke qāfiyoñ kī ai 'hijāb' ab to

vo tirchhī chitvanoñ vaalā bhī tujh ko daad detā hai

KHuda jaane mere dast-e-hawas ka kya irada hai

shab-e-KHalwat jo yun in ki taraf rah-rah ke baDhta hai

ghazab hai mudda'i meri tamanna ka wo ban baiThe

jise ye bhi nahin ma'lum mera mudda'a kya hai

raqibon se tu milta hai hamesha be-hijabana

jo parda hai to us parda-nashin ka hum se parada hai

jawani aane wali hai agar us shoKH kam-sin ki

to is betab ko bhi fikr-e-izhaar-e-tamanna hai

Thaharta hi nahin is dur-uftada ke hathon mein

KHuda jaane ye KHat kis chulbule ne mujh ko likkha hai

but-e-jadu bayan ne haye puchha kis mohabbat se

mere wahshi bata tu kis pari ka tujh ko sauda hai

madad ai aarzu-e-dasht-paimai ki zindan hai

salasil toD kar apne ye wahshi ab nikalta hai

karam ke ba'd andaz-e-sitam hargiz nahin zeba

hamara aashna na-ashna kaheko banta hai

tere banke jo un ke qafiyon ki ai 'hijab' ab to

wo tirchhi chitwanon wala bhi tujh ko dad deta hai