خدا جانے مرے دست ہوس کا کیا ارادہ ہے

خدا جانے مرے دست ہوس کا کیا ارادہ ہے

شب خلوت جو یوں ان کی طرف رہ رہ کے بڑھتا ہے

غضب ہے مدعی میری تمنا کا وہ بن بیٹھے

جسے یہ بھی نہیں معلوم میرا مدعا کیا ہے

رقیبوں سے تو ملتا ہے ہمیشہ بے حجابانہ

جو پردہ ہے تو اس پردہ نشیں کا ہم سے پردا ہے

جوانی آنے والی ہے اگر اس شوخ کم سن کی

تو اس بیتاب کو بھی فکر اظہار تمنا ہے

ٹھہرتا ہی نہیں اس دور افتادہ کے ہاتھوں میں

خدا جانے یہ خط کس چلبلے نے مجھ کو لکھا ہے

بت جادو بیاں نے ہائے پوچھا کس محبت سے

مرے وحشی بتا تو کس پری کا تجھ کو سودا ہے

مدد اے آرزوئے دشت پیمائی کہ زنداں ہے

سلاسل توڑ کر اپنے یہ وحشی اب نکلتا ہے

کرم کے بعد انداز ستم ہرگز نہیں زیبا

ہمارا آشنا نا آشنا کاہے کو بنتا ہے

ترے بانکے جو ان کے قافیوں کی اے حجابؔ اب تو

وہ ترچھی چتونوں والا بھی تجھ کو داد دیتا ہے