diya hota kisi ko dil to hoti qadr bhi dil ki

diyā hotā kisī ko dil to hotī qadr bhī dil kī

haqīqat pochhiye jā kar kisī bismil se bismil kī

faroġh-e-husn-e-jānāñ se baḌhī zīnat jo mahfil kī

tajallī dast-e-hasrat mil rahī thī māh-e-kāmil kī

patiñgoñ kī tarah uḌne lagīñ chiñgāriyāñ dil kī

ḳhudā jaane kahāñ le jā.egī vahshat mere dil kī

maiñ ḳhud gum-karda manzil huuñ ḳhabar kyā mujh ko manzil kī

na niklī hai na niklegī kabhī hasrat mere dil kī

sahar hone ko hai fariyād hai ye sham'-e-mahfil kī

ilāhī jalne vāloñ ke to dil meñ rah ga.ī dil kī

hifāzat apne imkāñ tak to maiñ ne ḳhuub kī dil kī

rakhī barsoñ talak jaisī bhī thī achchhī barī dil kī

magar afsos kaisī aa ga.ī bad-qismatī dil kī

huī bhī to huī kis be-vafā se dil lagī dil kī

milā kar ḳhaak meñ jis ne ḳhabar tak bhī na lī dil kī

kahāñ se lā.ūñ vo dil vo kalejā vo zabāñ bedam

jo us ujḌe hue dil kā kahūñ afsāna-e-pur-ġham

kabhī ābādiyāñ thiiñ us meñ ab to hū kā hai 'ālam

adā-o-nāz chashm-e-shokHī aur gesu-e-pur-ḳham

unhīñ ġhārat-garoñ ne mil ke bastī luuT lī dil kī

diya hota kisi ko dil to hoti qadr bhi dil ki

haqiqat pochhiye ja kar kisi bismil se bismil ki

farogh-e-husn-e-jaanan se baDhi zinat jo mahfil ki

tajalli dast-e-hasrat mil rahi thi mah-e-kaamil ki

patingon ki tarah uDne lagin chingariyan dil ki

KHuda jaane kahan le jaegi wahshat mere dil ki

main KHud gum-karda manzil hun KHabar kya mujh ko manzil ki

na nikli hai na niklegi kabhi hasrat mere dil ki

sahar hone ko hai fariyaad hai ye sham'-e-mahfil ki

ilahi jalne walon ke to dil mein rah gai dil ki

hifazat apne imkan tak to main ne KHub ki dil ki

rakhi barson talak jaisi bhi thi achchhi bari dil ki

magar afsos kaisi aa gai bad-qismati dil ki

hui bhi to hui kis be-wafa se dil lagi dil ki

mila kar KHak mein jis ne KHabar tak bhi na li dil ki

kahan se laun wo dil wo kaleja wo zaban bedam

jo us ujDe hue dil ka kahun afsana-e-pur-gham

kabhi aabaadiyan thin us mein ab to hu ka hai 'alam

ada-o-naz chashm-e-shokHi aur gesu-e-pur-KHam

unhin ghaarat-garon ne mil ke basti luT li dil ki