tere baghair saqiya lazzat-e-mai-kahsi nahin

tere baġhair sāqiyā lazzat-e-mai-kahsī nahīñ

āñkhoñ meñ mastiyāñ nahīñ dil meñ shaguftagī nahīñ

tujh ko tujhī se maañg kar maañg lī saarī kā.ināt

mujh sā koī gadā nahīñ tujh sā koī saḳhī nahīñ

tū is jahāñ meñ vā'izā phirtā hai kis ko DhūñDhtā

shah-e-rag se bhī qarīb hai terī nazar paḌī nahīñ

miT jā kisī ke 'ishq meñ terā maqām hai yahī

husn kī bārgāh meñ jalvoñ kī kuchh kamī nahīñ

band hijāb toḌ kar dast-e-talab baḌhā bhī de

aaj nigāh-e-yār meñ pahlī sī barhamī nahīñ

tere huzūr aa.e haiñ rahm kī bhiik māñgne

TuuTe diloñ kā aasrā tere sivā koī nahīñ

tere karam se hai niyāz kaun sī shai milī nahīñ

jholī hamārī tañg hai tere haañ kamī nahīñ

'ishq meñ shikva kufr hai aur iltijā hai harām

toḌ de kāsa-e-murād ’ishq gadāgarī nahīñ

āñkhoñ meñ ashk dil meñ Thes lab par fuġhāñ jigar meñ soz

'ishq kī haiñ navāzisheñ dard meñ kuchh kamī nahīñ

tere baghair saqiya lazzat-e-mai-kahsi nahin

aankhon mein mastiyan nahin dil mein shaguftagi nahin

tujh ko tujhi se mang kar mang li sari kainat

mujh sa koi gada nahin tujh sa koi saKHi nahin

tu is jahan mein wa'iza phirta hai kis ko DhunDhta

shah-e-rag se bhi qarib hai teri nazar paDi nahin

miT ja kisi ke 'ishq mein tera maqam hai yahi

husn ki bargah mein jalwon ki kuchh kami nahin

band hijab toD kar dast-e-talab baDha bhi de

aaj nigah-e-yar mein pahli si barhami nahin

tere huzur aae hain rahm ki bhik mangne

TuTe dilon ka aasra tere siwa koi nahin

tere karam se hai niyaz kaun si shai mili nahin

jholi hamari tang hai tere han kami nahin

'ishq mein shikwa kufr hai aur iltija hai haram

toD de kasa-e-murad ’ishq gadagari nahin

aankhon mein ashk dil mein Thes lab par fughan jigar mein soz

'ishq ki hain nawazishen dard mein kuchh kami nahin