تیرے بغیر ساقیا لذت میکشی نہیں

تیرے بغیر ساقیا لذت میکشی نہیں

آنکھوں میں مستیاں نہیں دل میں شگفتگی نہیں

تجھ کو تجھی سے مانگ کر مانگ لی ساری کائنات

مجھ سا کوئی گدا نہیں تجھ سا کوئی سخی نہیں

تو اس جہاں میں واعظا پھرتا ہے کس کو ڈھونڈھتا

شہ رگ سے بھی قریب ہے تیری نظر پڑی نہیں

مٹ جا کسی کے عشق میں تیرا مقام ہے یہی

حسن کی بارگاہ میں جلووں کی کچھ کمی نہیں

بند حجاب توڑ کر دست طلب بڑھا بھی دے

آج نگاہ یار میں پہلی سی برہمی نہیں

تیرے حضور آئے ہیں رحم کی بھیک مانگنے

ٹوٹے دلوں کا آسرا تیرے سوا کوئی نہیں

تیرے کرم سے ہے نیاز کون سی شئے ملی نہیں

جھولی ہماری تنگ ہے تیرے ہاں کمی نہیں

عشق میں شکوہ کفر ہے اور التجا ہے حرام

توڑ دے کاسۂ مراد عشق گداگری نہیں

آنکھوں میں اشک دل میں ٹھیس لب پر فغاں جگر میں سوز

عشق کی ہیں نوازشیں درد میں کچھ کمی نہیں