sitam se baz aa zalim qiyamat hone wali hai

sitam se baaz aa zālim qiyāmat hone vaalī hai

ye pesh-e-dāvar-e-mahshar 'adālat hone vaalī hai

nazar baazū sambhal baiTho qiyāmat hone vaalī hai

kisī ke husn roz-afzūñ kī shohrat hone vaalī hai

hamāre 'ishq kī duniyā meñ shohrat hone vaalī hai

kisī ma.ashūq kamsin kī sharārat hone vaalī hai

ḳhadañg-e-yār kā mushtāq dil bhī hai jigar bhī hai

sitam ye hai ki donoñ meñ raqābat hone vaalī hai

na iThlā kar chalo har-har qadam par aisī shoḳhī se

tumhārī chaal se barpā qiyāmat hone vaalī hai

kisī ke husn par un kī tabī.at aatī jaatī hai

hasīnoñ ko ḳhabar kar do 'adālat hone vaalī hai

liye shamshīr-e-burrāñ aaj vo maqtal meñ aate haiñ

mubārakbād mushtāqo shahādat hone vaalī hai

sitam se baz aa zalim qiyamat hone wali hai

ye pesh-e-dawar-e-mahshar 'adalat hone wali hai

nazar bazu sambhal baiTho qiyamat hone wali hai

kisi ke husn roz-afzun ki shohrat hone wali hai

hamare 'ishq ki duniya mein shohrat hone wali hai

kisi mashuq kamsin ki shararat hone wali hai

KHadang-e-yar ka mushtaq dil bhi hai jigar bhi hai

sitam ye hai ki donon mein raqabat hone wali hai

na iThla kar chalo har-har qadam par aisi shoKHi se

tumhaari chaal se barpa qiyamat hone wali hai

kisi ke husn par un ki tabiat aati jati hai

hasinon ko KHabar kar do 'adalat hone wali hai

liye shamshir-e-burran aaj wo maqtal mein aate hain

mubarakbaad mushtaqo shahadat hone wali hai