ستم سے باز آ ظالم قیامت ہونے والی ہے

ستم سے باز آ ظالم قیامت ہونے والی ہے

یہ پیش داور محشر عدالت ہونے والی ہے

نظر بازو سنبھل بیٹھو قیامت ہونے والی ہے

کسی کے حسن روز افزوں کی شہرت ہونے والی ہے

ہمارے عشق کی دنیا میں شہرت ہونے والی ہے

کسی معشوق کمسن کی شرارت ہونے والی ہے

خدنگ یار کا مشتاق دل بھی ہے جگر بھی ہے

ستم یہ ہے کہ دونوں میں رقابت ہونے والی ہے

نہ اٹھلا کر چلو ہرہر قدم پر ایسی شوخی سے

تمہاری چال سے برپا قیامت ہونے والی ہے

کسی کے حسن پر ان کی طبیعت آتی جاتی ہے

حسینوں کو خبر کر دو عدالت ہونے والی ہے

لئے شمشیر براں آج وہ مقتل میں آتے ہیں

مبارک باد مشتاقو شہادت ہونے والی ہے