jo puchha humne hasrat-e-wasl ki kab dil se niklegi

jo pūchhā ham ne hasrat-e-vasl kī kab dil se niklegī

to farmāne lage hañs kar baḌī mushkil se niklegī

hamārī laash jis dam kūcha-e-qātil se niklegī

qiyāmat jis ko kahte haiñ tirī mahfil se niklegī

lipaT jā ḳhanjar-e-qātil se gar shauq-e-shahādat hai

vahī maqbūl hovegī du'ā jo dil se niklegī

hamārā naam lekar khīñch tū ik aah ai majnūñ

abhī lailā taḌap kar parda-e-mahmil se niklegī

du'ā dūñgā jo ḳhush hūñgā satāoge to kosuñgā

'safīr' achchhī bhī niklegī burī bhī dil se niklegī

jo puchha hum ne hasrat-e-wasl ki kab dil se niklegi

to farmane lage hans kar baDi mushkil se niklegi

hamari lash jis dam kucha-e-qatil se niklegi

qiyamat jis ko kahte hain teri mahfil se niklegi

lipaT ja KHanjar-e-qatil se gar shauq-e-shahadat hai

wahi maqbul howegi du'a jo dil se niklegi

hamara nam lekar khinch tu ek aah ai majnun

abhi laila taDap kar parda-e-mahmil se niklegi

du'a dunga jo KHush hunga sataoge to kosunga

'safir' achchhi bhi niklegi buri bhi dil se niklegi