na chheDo hamein dil dukhae hue hain

na chheḌo hameñ dil dukhā.e hue haiñ

judā.ī ke sadme uThā.e hue haiñ

hayā dil meñ se un kī jaatī nahīñ hai

vo āñchal se muñh ko chhupā.e hue haiñ

gila baḳht kā aur na shikva falak kā

dil-e-ġham-zadā ke satā.e hue haiñ

mazār-e-shahīdāñ pe qātil ye bolā

ye sab ghar hamāre basā.e hue haiñ

paḌī hai jo mushkil na ghabrāo 'rañgīñ'

'alī bahr-e-imdād aa.e hue haiñ

na chheDo hamein dil dukhae hue hain

judai ke sadme uThae hue hain

haya dil mein se un ki jati nahin hai

wo aanchal se munh ko chhupae hue hain

gila baKHt ka aur na shikwa falak ka

dil-e-gham-zada ke satae hue hain

mazar-e-shahidan pe qatil ye bola

ye sab ghar hamare basae hue hain

paDi hai jo mushkil na ghabrao 'rangin'

'ali bahr-e-imdad aae hue hain