Khaar-e-hasrat qabr tak dil mein khaTakta jaega

ḳhār-e-hasrat qabr tak dil meñ khaTaktā jā.egā

murġh-e-bismil kī tarah lāsha pharaktā jā.egā

dekhiye kab tak javāb-e-ḳhat se āñkheñ shaad hoñ

rāsta dekhā nahīñ qāsid bhaTaktā jā.egā

jaan jā.egī jo ‘ishq-e-’āriz-e-gul-rañg meñ

taḳhta-e-tābūt misl-e-gul mahaktā jā.egā

maiñ vo kushta huuñ ki merī laash par ai dosto

ik zamāna dīda-e-hasrat se taktā jā.egā

chun ke afshāñ baam par bahr-e-ḳhudā mat jā.iyo

ai sanam jo dekh legā sar Tapaktā jā.egā

mar gayā huuñ maiñ kisī kī hasrat-e-dīdār meñ

qabr tak lāsha bhī merā raah taktā jā.egā

ai 'zafar' qaa.im rahegī jab talak aqlīm-e-hind

akHtar-e-iqbāl us gul kā chamaktā jā.egā

KHar-e-hasrat qabr tak dil mein khaTakta jaega

murgh-e-bismil ki tarah lasha pharakta jaega

dekhiye kab tak jawab-e-KHat se aankhen shad hon

rasta dekha nahin qasid bhaTakta jaega

jaan jaegi jo ‘ishq-e-’ariz-e-gul-rang mein

taKHta-e-tabut misl-e-gul mahakta jaega

main wo kushta hun ki meri lash par ai dosto

ek zamana dida-e-hasrat se takta jaega

chun ke afshan baam par bahr-e-KHuda mat jaiyo

ai sanam jo dekh lega sar Tapakta jaega

mar gaya hun main kisi ki hasrat-e-didar mein

qabr tak lasha bhi mera rah takta jaega

ai 'zafar' qaim rahegi jab talak aqlim-e-hind

akHtar-e-iqbaal us gul ka chamakta jaega