bait-us-sanam ko chhoD ke kabe na jaenge

bait-us-sanam ko chhoḌ ke ka.abe na jā.eñge

vaañ bhī vahī sanam ho to kyā muñh dikhā.eñge

josh-e-junūñ meñ ham bhī kabhī apne ā.eñge

majnūñ baneñge ham tumheñ lailā banā.eñge

'āshiq ko kyā zarūr hai ka.abe ko jaane kī

ham apnā kū-e-yār meñ ka.aba banā.eñge

rashk-e-masīh baaġh meñ tashrīf lā.eñge

bulbul kareñge shor to gul ḳhaar khā.eñge

yaaro kafan hamāre liye kyā zarūr hai

'uryāñ jahāñ meñ aa.e haiñ 'uryāñ hī jā.eñge

duniyā meñ aake ham ne koī kaam nā ka.e

nekī kahāñ hai saath jo ham le ke jā.eñge

zāhid ummīd hai hameñ dozaḳh kī aag se

mahshar ke roz hazrat-e-maulā bachā.eñge

qudrat vasīla hai tumheñ ma.abūd-e-pāk kā

'sābir' ke dar ko chhoḌ ke hargiz na jā.eñge

bait-us-sanam ko chhoD ke kabe na jaenge

wan bhi wahi sanam ho to kya munh dikhaenge

josh-e-junun mein hum bhi kabhi apne aaenge

majnun banenge hum tumhein laila banaenge

'ashiq ko kya zarur hai kabe ko jaane ki

hum apna ku-e-yar mein kaba banaenge

rashk-e-masih bagh mein tashrif laenge

bulbul karenge shor to gul KHar khaenge

yaro kafan hamare liye kya zarur hai

'uryan jahan mein aae hain 'uryan hi jaenge

duniya mein aake hum ne koi kaam na kae

neki kahan hai sath jo hum le ke jaenge

zahid ummid hai hamein dozaKH ki aag se

mahshar ke roz hazrat-e-maula bachaenge

qudrat wasila hai tumhein mabud-e-pak ka

'sabir' ke dar ko chhoD ke hargiz na jaenge