mubarak jawani pe aana kisi ka

mubārak javānī pe aanā kisī kā

huā auj par ab zamāna kisī kā

shab-e-vasl to chain se guzrī lekin

sitam ho gayā sub.h jaanā kisī kā

utar aa.e zohra falak se chhamā-chham

ye hai sehr vallāh gaanā kisī kā

bulāyā hai qāsid to jā kar ye kah de

ki kyā khel samjhā hai aanā kisī kā

liyā bosa jhaT-jhaT to jhuñjhlā ke bole

hai be-shak burā muñh lagānā kisī kā

kahā hāl-e-dil merā suniye to bole

nahīñ bhātā ham ko fasānā kisī kā

lage toḌne band mahram ke joban

sitam hai javānī pe aanā kisī kā

yahāñ kyā hai mahshar meñ ma.alūm hogā

tumheñ sho.ala-rū yuuñ jalānā kisī kā

ġhazab thā sitam thā vo aTkheliyoñ se

chhamā-chham shab-e-vasl aanā kisī kā

kahā un ko jab sho.ala-rū hañs ke bole

hai zebā hameñ ab jalānā kisī kā

vo baiThe haiñ koThe pe bikhrā ke zulfeñ

hai madd-e-nazar dil phañsānā kisī kā

ḳhizāñ aate hī baaġh mātam-sarā thā

qiyāmat hai bulbul ye aanā kisī kā

mohabbat meñ kho baiThe jān-o-jigar dil

batā.eñ tumheñ kyā Thikānā kisī kā

chhupā kar dupaTTe se muñh apnā bole

mazā de gayā muskurānā kisī kā

na maġhrūr ho daulat-e-husn par tum

rahā hai kahāñ ye ḳhazānā kisī kā

sabhī kahte the 'ishq hai āfat-e-jāñ

kahā tum ne hargiz na maanā kisī kā

dil aate hī dam ho gayā apnā ruḳhsat

ye aanā kisī kā hai jaanā kisī kā

Daro ai buto hai vo allāh kā ghar

bahut man’a hai dil dukhānā kisī kā

vahīñ bhuul jā.egī ye naġhma-sanjī

jo tū sun le bulbul tarānā kisī kā

hue saikḌoñ qatl bismil hazāroñ

ye hai qahr surma lagānā kisī kā

muqarrar balā koī lā.egā sar par

'abas hai ye gesū baḌhānā kisī kā

jo dam nikle apnā to yuuñ nikle yā-rab

merā sar ho aur āstānā kisī kā

hue narm sun-sun ke vo haal merā

fusūñ ho gayā ye fasānā kisī kā

na sad-chāk kyuuñ merā ho rashk se dil

bahut sar-phirā hai ye shānā kisī kā

hai pachhtāne se fā.eda kyā ab ai dil

jo pahle hī kahnā na maanā kisī kā

ḳhabar merī rehlat kī sun kar vo bole

ki aaj uTh gayā āb-o-dānā kisī kā

mubarak jawani pe aana kisi ka

hua auj par ab zamana kisi ka

shab-e-wasl to chain se guzri lekin

sitam ho gaya subh jaana kisi ka

utar aae zohra falak se chhama-chham

ye hai sehr wallah gana kisi ka

bulaya hai qasid to ja kar ye kah de

ki kya khel samjha hai aana kisi ka

liya bosa jhaT-jhaT to jhunjhla ke bole

hai be-shak bura munh lagana kisi ka

kaha haal-e-dil mera suniye to bole

nahin bhata hum ko fasana kisi ka

lage toDne band mahram ke joban

sitam hai jawani pe aana kisi ka

yahan kya hai mahshar mein malum hoga

tumhein shoala-ru yun jalana kisi ka

ghazab tha sitam tha wo aTkheliyon se

chhama-chham shab-e-wasl aana kisi ka

kaha un ko jab shoala-ru hans ke bole

hai zeba hamein ab jalana kisi ka

wo baiThe hain koThe pe bikhra ke zulfen

hai madd-e-nazar dil phansana kisi ka

KHizan aate hi bagh matam-sara tha

qiyamat hai bulbul ye aana kisi ka

mohabbat mein kho baiThe jaan-o-jigar dil

bataen tumhein kya Thikana kisi ka

chhupa kar dupaTTe se munh apna bole

maza de gaya muskurana kisi ka

na maghrur ho daulat-e-husn par tum

raha hai kahan ye KHazana kisi ka

sabhi kahte the 'ishq hai aafat-e-jaan

kaha tum ne hargiz na mana kisi ka

dil aate hi dam ho gaya apna ruKHsat

ye aana kisi ka hai jaana kisi ka

Daro ai buto hai wo allah ka ghar

bahut man’a hai dil dukhana kisi ka

wahin bhul jaegi ye naghma-sanji

jo tu sun le bulbul tarana kisi ka

hue saikDon qatl bismil hazaron

ye hai qahr surma lagana kisi ka

muqarrar bala koi laega sar par

'abas hai ye gesu baDhana kisi ka

jo dam nikle apna to yun nikle ya-rab

mera sar ho aur aastana kisi ka

hue narm sun-sun ke wo haal mera

fusun ho gaya ye fasana kisi ka

na sad-chaak kyun mera ho rashk se dil

bahut sar-phira hai ye shana kisi ka

hai pachhtane se faeda kya ab ai dil

jo pahle hi kahna na mana kisi ka

KHabar meri rehlat ki sun kar wo bole

ki aaj uTh gaya aab-o-dana kisi ka