na mai-e-shamshir hoti hai na nok-e-tir hoti hai

na mai-e-shamshīr hotī hai na nok-e-tīr hotī hai

nigāh-e-mast saaqī kī ye sab tāsīr hotī hai

yahī dekhā ki nākām-e-asar tadbīr hotī hai

jo hone vaalī hotī hai ba-har taqdīr hai hai

idhar taḳhrīb ke sāmāñ idhar tā'mīr hotī hai

vahāñ taqdīr-e-hastī hai yahāñ tadbīr hotī hai

ye maanā lan-tarānī nāz-e-ma.ashūqāna hai lekin

tumhāre dekhne vaale kī bhī tahqīr hotī hai

‘ajab tāsīr ye ḳhāk-e-fanā-fil-’ishq meñ dekhī

vo jhuñjhlā kar jhaTakte haiñ ba-dāman-gīr hotī hai

jo jal kar ḳhaak ho jaatā hai dil-soz-e-mohabbat se

vo ḳhākistar nahīñ iksīr gar iksīr hotī hai

qazā ko bhī taras aatā nahīñ un kī musībat par

tumhāre marne vāloñ kī 'ajab taqdīr hotī hai

yahāñ tak e'tibār-e-'ishq sādiq hai unheñ merā

ḳhatā chāhe kisī kī ho mujhe tā'zīr hotī hai

shab-e-furqat meñ be-tābī bhī mahshar meñ hai rusvā.ī

bahar-sūrat mirī tash.hīr par tash.hīr hotī hai

du'ā meñ lutf miltā hai nahīñ mā'lūm ye ham ko

vo tāsīr hotī hai ki be-tāsīr hotī hai

ḳhudā mā'lūm vo kis martabe ke piine vaale the

ki jin kī ḳhaak se mai-ḳhānoñ kī tā'mīr hotī hai

nazar aatī hai apnī shakl meñ shakl aap kī mujh ko

mirī tasvīr goyā aap kī tasvīr hotī hai

Darā hai 'azāb-e-hashr se vā'iz vo kyā jaane

ḳhatā insāñ se bar-andāza-e-tā’zīr hotī hai

judā andāz haiñ har ghar meñ 'ra.anā' sāz-e-vahdat ke

kahīñ nāqūs bajtā hai kahīñ takbīr hotī hai

na mai-e-shamshir hoti hai na nok-e-tir hoti hai

nigah-e-mast saqi ki ye sab tasir hoti hai

yahi dekha ki nakaam-e-asar tadbir hoti hai

jo hone wali hoti hai ba-har taqdir hai hai

idhar taKHrib ke saman idhar ta'mir hoti hai

wahan taqdir-e-hasti hai yahan tadbir hoti hai

ye mana lan-tarani naz-e-mashuqana hai lekin

tumhaare dekhne wale ki bhi tahqir hoti hai

‘ajab tasir ye KHak-e-fana-fil-’ishq mein dekhi

wo jhunjhla kar jhaTakte hain ba-daman-gir hoti hai

jo jal kar KHak ho jata hai dil-soz-e-mohabbat se

wo KHakistar nahin iksir gar iksir hoti hai

qaza ko bhi taras aata nahin un ki musibat par

tumhaare marne walon ki 'ajab taqdir hoti hai

yahan tak e'tibar-e-'ishq sadiq hai unhen mera

KHata chahe kisi ki ho mujhe ta'zir hoti hai

shab-e-furqat mein be-tabi bhi mahshar mein hai ruswai

bahar-surat meri tashhir par tashhir hoti hai

du'a mein lutf milta hai nahin ma'lum ye hum ko

wo tasir hoti hai ki be-tasir hoti hai

KHuda ma'lum wo kis martabe ke pine wale the

ki jin ki KHak se mai-KHanon ki ta'mir hoti hai

nazar aati hai apni shakl mein shakl aap ki mujh ko

meri taswir goya aap ki taswir hoti hai

Dara hai 'azab-e-hashr se wa'iz wo kya jaane

KHata insan se bar-andaza-e-ta’zir hoti hai

juda andaz hain har ghar mein 'rana' saz-e-wahdat ke

kahin naqus bajta hai kahin takbir hoti hai