did-e-jamal-e-haq hui husn-e-nigar dekh kar

dīd-e-jamāl-e-haq huī husn-e-nigār dekh kar

ban ga.e but-parast ham sūrat-e-yār pekh kar

jaane kahāñ kahāñ qadam rakkhe mire huzūr ne

sajde kiye haiñ jā-bajā un kā dayār dekh kar

kab thā nasīb meñ sukūñ pahle hī haal thā zubūñ

baḌh ga.iiñ aur uljhaneñ gesū-e-yār dekh kar

pahle to chup khaḌe rahe sar ko jhukā.e sharm se

ro diye phūT-phūT kar merā mazār dekh kar

'sājid' nazar jo aa.e ham ye kyā kiyā chashm-e-yār ne

tīr-e-nazar chalā diyā apnā shikār dekh kar

did-e-jamal-e-haq hui husn-e-nigar dekh kar

ban gae but-parast hum surat-e-yar pekh kar

jaane kahan kahan qadam rakkhe mere huzur ne

sajde kiye hain ja-baja un ka dayar dekh kar

kab tha nasib mein sukun pahle hi haal tha zubun

baDh gain aur uljhanen gesu-e-yar dekh kar

pahle to chup khaDe rahe sar ko jhukae sharm se

ro diye phuT-phuT kar mera mazar dekh kar

'sajid' nazar jo aae hum ye kya kiya chashm-e-yar ne

tir-e-nazar chala diya apna shikar dekh kar