دید جمال حق ہوئی حسن نگار دیکھ کر

دید جمال حق ہوئی حسن نگار دیکھ کر

بن گئے بت پرست ہم صورت یار دیکھ کر

جانے کہاں کہاں قدم رکھے مرے حضور نے

سجدے کیے ہیں جابجا ان کا دیار دیکھ کر

کب تھا نصیب میں سکوں پہلے ہی حال تھا زبوں

بڑھ گئیں اور الجھنیں گیسوئے یار دیکھ کر

پہلے تو چپ کھڑے رہے سر کو جھکائے شرم سے

رو دیے پھوٹ پھوٹ کر میرا مزار دیکھ کر

ساجدؔ نظر جو آئے ہم یہ کیا کیا چشم یار نے

تیر نظر چلا دیا اپنا شکار دیکھ کر