shaiKH-ji baiTh kar mai-kashon mein tark-e-mai ka irada na karna

shaiḳh-jī baiTh kar mai-kashoñ meñ tark-e-mai kā irāda na karnā

kufr hai aisī ne'amat ko pākar shukr kā ek sajda na karnā

kālī-kālī ghaTā chhā ga.ī hai chal rahī hai havā ThanDī-ThanDī

rut nashīlī hai do ghūñT pī lo duniyā vāloñ kī parvā na karnā

chhup ke saaqī ke dāman meñ chakh lo hogā īmān taaza tumhārā

aaj fursat milī hai gunah kī pārsā.ī kā da'ava na karnā

kis tarah hogī baḳhshish tumhārī josh aa.egā kaise ḳhudā ko

us kī rahmat pe kar ke bharosa kufr hai is gunah kā na karnā

kyā ġhazab kar rahe ho ḳhudā-rā mai se labrez sāġhar na toḌo

TuuT kar bad-du'ā jaam deñge bāda-noshī se tauba na karnā

kah rahe ho burā mai ko 'bismil' kyuuñ gunāh mol lete ho sar par

ḳhud pilā.eñ-gī jannat meñ hūreñ mai ko duniyā meñ rusvā na karnā

shaiKH-ji baiTh kar mai-kashon mein tark-e-mai ka irada na karna

kufr hai aisi ne'amat ko pakar shukr ka ek sajda na karna

kali-kali ghaTa chha gai hai chal rahi hai hawa ThanDi-ThanDi

rut nashili hai do ghunT pi lo duniya walon ki parwa na karna

chhup ke saqi ke daman mein chakh lo hoga iman taza tumhaara

aaj fursat mili hai gunah ki parsai ka da'awa na karna

kis tarah hogi baKHshish tumhaari josh aaega kaise KHuda ko

us ki rahmat pe kar ke bharosa kufr hai is gunah ka na karna

kya ghazab kar rahe ho KHuda-ra mai se labrez saghar na toDo

TuT kar bad-du'a jam denge baada-noshi se tauba na karna

kah rahe ho bura mai ko 'bismil' kyun gunah mol lete ho sar par

KHud pilaen-gi jannat mein huren mai ko duniya mein ruswa na karna