us bazm meñ mujhe nahīñ bantī hayā kiye

us bazm meñ mujhe nahīñ bantī hayā kiye

baiThā rahā agarche ishāre huā kiye

dil hī to hai siyāsat-e-darbāñ se Dar gayā

maiñ aur jā.ūñ dar se tire bin sadā kiye

rakhtā phirūñ huuñ ḳhirqa o sajjāda rahn-e-mai

muddat huī hai dāvat āb-o-havā kiye

be-sarfa hī guzartī hai ho garche umr-e-ḳhizr

hazrat bhī kal kaheñge ki ham kyā kiyā kiye

maqdūr ho to ḳhaak se pūchhūñ ki ai la.iim

tū ne vo ganj-hā-e-garāñ-māya kyā kiye

kis roz tohmateñ na tarāshā kiye adū

kis din hamāre sar pe na aare chalā kiye

sohbat meñ ġhair kī na paḌī ho kahīñ ye ḳhū

dene lagā hai bosa baġhair iltijā kiye

zid kī hai aur baat magar ḳhū burī nahīñ

bhūle se us ne saikḌoñ va.ade vafā kiye

'ġhālib' tumhīñ kaho ki milegā javāb kyā

maanā ki tum kahā kiye aur vo sunā kiye

us bazm meñ mujhe nahīñ bantī hayā kiye

baiThā rahā agarche ishāre huā kiye

dil hī to hai siyāsat-e-darbāñ se Dar gayā

maiñ aur jāūñ dar se tere bin sadā kiye

rakhtā phirūñ huñ ḳhirqa o sajjāda rahn-e-mai

muddat huī hai dāwat āb-o-hawā kiye

be-sarfa hī guzartī hai ho garche umr-e-ḳhizr

hazrat bhī kal kaheñge ki hum kyā kiyā kiye

maqdūr ho to ḳhak se pūchhūñ ki ai laim

tū ne wo ganj-hā-e-garāñ-māya kyā kiye

kis roz tohmateñ na tarāshā kiye adū

kis din hamāre sar pe na aare chalā kiye

sohbat meñ ġhair kī na paḌī ho kahīñ ye ḳhū

dene lagā hai bosa baġhair iltijā kiye

zid kī hai aur baat magar ḳhū burī nahīñ

bhūle se us ne saikḌoñ wade wafā kiye

'ġhālib' tumhīñ kaho ki milegā jawāb kyā

manā ki tum kahā kiye aur wo sunā kiye