wo be-kas hun nahin hai koi mere gham-gusaron mein

vo be-kas huuñ nahīñ hai koī mere ġham-gusāroñ meñ

faqat ik dil hai to vo bhī tumhāre jāñ-nisāroñ meñ

tave kī buuñd badlī hī nahīñ in ashk-bāroñ meñ

sharār-e-murda hai bijlī bhī tere be-qarāroñ meñ

haqīqat āshiqoñ kī marg kī ham se koī pūchhe

bahut jab niiñd aa.ī so rahe jā kar mazāroñ meñ

nigāh-e-yār kyā badlī jahāñ badlā havā badlī

vo dushman jaan ke haiñ the jo aage jāñ-nisāroñ meñ

uḌā paarā jalā ispand dab kar rah ga.ī bijlī

hamīñ sābit-qadam Thahre tumhāre be-qarāroñ meñ

farishtoñ se kaho itnī qiyāmat meñ ḳhabar rakheñ

kahīñ chhup-chhup ke zāhid mil na jaa.eñ bāda-ḳhvāroñ meñ

judā hai duḳht-e-raz kā naam har sohbat meñ ai saaqī

parī hai mai-kashoñ meñ huur hai parhezgāroñ meñ

bahut the jalva-gāh-e-yār meñ dīdār ke tālib

kalīm-ullāh aage baḌh ga.e ummīdvāroñ meñ

ḳhudā jaane kahāñ dil jaan kis jalse meñ hai apnī

ba-zāhir but bane baiThe haiñ ham har chand yāroñ meñ

sū-e-gor-e-garībāñ aa.eñ vo ye pūchhte yā-rab

mere kushte kī turbat kaun sī hai in mazāroñ meñ

tirā ubhrā huā joban ye un ko gudgudātā hai

ki lauTe jaate haiñ maare hañsī ko phuul hāroñ meñ

qabā ke band kholo parda ulTo kuchh hañso bolo

jo aa.e ho to baiTho be-takalluf ho ke yāroñ meñ

idhar bhī ik nigāh-e-nāz apne husn kā sadqa

ki roz-e-hashr merī aañkh nīchī ho na yāroñ meñ

'amīr' un se na bachtī duḳht-e-raz āñkhoñ meñ pī jaate

javānī kā guzar shāyad nahīñ parhezgāroñ meñ

wo be-kas hun nahin hai koi mere gham-gusaron mein

faqat ek dil hai to wo bhi tumhaare jaan-nisaron mein

tawe ki bund badli hi nahin in ashk-baron mein

sharar-e-murda hai bijli bhi tere be-qararon mein

haqiqat aashiqon ki marg ki hum se koi puchhe

bahut jab nind aai so rahe ja kar mazaron mein

nigah-e-yar kya badli jahan badla hawa badli

wo dushman jaan ke hain the jo aage jaan-nisaron mein

uDa para jala ispand dab kar rah gai bijli

hamin sabit-qadam Thahre tumhaare be-qararon mein

farishton se kaho itni qiyamat mein KHabar rakhen

kahin chhup-chhup ke zahid mil na jaen baada-KHwaron mein

juda hai duKHt-e-raz ka nam har sohbat mein ai saqi

pari hai mai-kashon mein hur hai parhezgaron mein

bahut the jalwa-gah-e-yar mein didar ke talib

kalim-ullah aage baDh gae ummidwaron mein

KHuda jaane kahan dil jaan kis jalse mein hai apni

ba-zahir but bane baiThe hain hum har chand yaron mein

su-e-gor-e-gariban aaen wo ye puchhte ya-rab

mere kushte ki turbat kaun si hai in mazaron mein

tera ubhra hua joban ye un ko gudgudata hai

ki lauTe jate hain mare hansi ko phul haaron mein

qaba ke band kholo parda ulTo kuchh hanso bolo

jo aae ho to baiTho be-takalluf ho ke yaron mein

idhar bhi ek nigah-e-naz apne husn ka sadqa

ki roz-e-hashr meri aankh nichi ho na yaron mein

'amir' un se na bachti duKHt-e-raz aankhon mein pi jate

jawani ka guzar shayad nahin parhezgaron mein