jab ghair nazar se dur hua aur pai safai nainan mein

jab ġhair nazar se duur huā aur paa.ī safā.ī nainan meñ

tab shaan ḳhudā kī aa.ī nazar ban-ban ke ḳhudā.ī nainan meñ

ne dair meñ bhī tujh se milāne bhuul ke maiñ bhī kā'ba gayā

jab ahl-e-nazar se aañkh laḌī tab ramz bhī paa.ī nainan meñ

me'arāj agar honā hai tujhe aur haq se agar milnā hai tujhe

to tār-e-nazar ko ziina banā aur kar le rasā.ī nainan meñ

kasrat tū jise samjhā hai yahāñ vahdat hai vahī tū dekh 'ayāñ

kahte haiñ judā par dekhne ko paa.ī na judā.ī nainan meñ

vo mujh se jo pūchhā aa.uuñ kahāñ aur aap ko tujh meñ pā.ūñ kahāñ

tab dil kī safā.ī himmat se jānāñ ko bulā.ī nainan meñ

to tujh ko nazar se apne chhupā aa.egī nazar tab shān-e-ḳhudā

maknūñ hai burā.ī nainan meñ mash.hūñ hai bhalā.ī nainan meñ

paḌtī hai nazar jis shai pe mirī aatā hai nazar meñ saaf vahī

ummīd mirī ai ahl-e-nazar ḳhāliq se bar aa.ī nainan meñ

aatā hī nahīñ hai koī nazar juz haq ke hameñ ab jalva-gar

pherī hai janāb-e-'ishq ne ḳhud himmat se duhā.ī nainan meñ

kaunain hai tere pesh-e-nazar par tujh ko koī dekhā na bashar

har shaan se tū ne dīda-nashīñ sūrat jo chhupā.ī nainan meñ

ne zikr-e-ḳhudā ne fikr-e-ḳhudī ne ġhair na apnī yaad rahī

ik dīda-nashīñ kī diid 'vatan' bistar hai jamā.ī nainan meñ

DhūñDā maiñ 'vatan' gauhar dūsrā par mujh ko kahīñ banda na milā

kyā shaan ḳhudā kī shukr-e-ḳhudā be-parda samā.ī nainan meñ

jab ghair nazar se dur hua aur pai safai nainan mein

tab shan KHuda ki aai nazar ban-ban ke KHudai nainan mein

ne dair mein bhi tujh se milane bhul ke main bhi ka'ba gaya

jab ahl-e-nazar se aankh laDi tab ramz bhi pai nainan mein

me'araj agar hona hai tujhe aur haq se agar milna hai tujhe

to tar-e-nazar ko zina bana aur kar le rasai nainan mein

kasrat tu jise samjha hai yahan wahdat hai wahi tu dekh 'ayan

kahte hain juda par dekhne ko pai na judai nainan mein

wo mujh se jo puchha aaun kahan aur aap ko tujh mein paun kahan

tab dil ki safai himmat se jaanan ko bulai nainan mein

to tujh ko nazar se apne chhupa aaegi nazar tab shan-e-KHuda

maknun hai burai nainan mein mashhun hai bhalai nainan mein

paDti hai nazar jis shai pe meri aata hai nazar mein saf wahi

ummid meri ai ahl-e-nazar KHaliq se bar aai nainan mein

aata hi nahin hai koi nazar juz haq ke hamein ab jalwa-gar

pheri hai janab-e-'ishq ne KHud himmat se duhai nainan mein

kaunain hai tere pesh-e-nazar par tujh ko koi dekha na bashar

har shan se tu ne dida-nashin surat jo chhupai nainan mein

ne zikr-e-KHuda ne fikr-e-KHudi ne ghair na apni yaad rahi

ek dida-nashin ki did 'watan' bistar hai jamai nainan mein

DhunDa main 'watan' gauhar dusra par mujh ko kahin banda na mila

kya shan KHuda ki shukr-e-KHuda be-parda samai nainan mein