rahta hai jaan arsh pe tan hai yahan mera

rahtā hai jaan 'arsh pe tan hai yahāñ mirā

paayā maiñ lā-makāñ se pare hai makāñ mirā

ek baat hai sabāt-e-jahāñ mere nutq se

goyā hai bhed ganj-e-ḳhafī kā vahāñ mirā

haq mujh meñ ā.īna hai maiñ huuñ haq kā ā.īna

shān-e-safā hai hāl-e-nihāñ-o-'ayāñ mirā

rahtā huuñ chashm-e-ahl-e-basar kī nigāh meñ

miltā hai nukta-dāñ ke suḳhan meñ nishāñ mirā

zāt-e-ḳhudā hai fahm meñ vahm hai ḳhudī

'ilmul-yaqīn samjho to haq hai gumāñ mirā

dair-o-haram meñ bhuul ke rakkhā na maiñ ne paañv

siine meñ ahl-e-dil ke hai jab se makāñ mirā

maiñ vo tilism-e-ġhaib-o-shahādat huuñ ai 'vatan'

suntā huuñ naam par nahīñ miltā nishāñ mirā

rahta hai jaan 'arsh pe tan hai yahan mera

paya main la-makan se pare hai makan mera

ek baat hai sabaat-e-jahan mere nutq se

goya hai bhed ganj-e-KHafi ka wahan mera

haq mujh mein aaina hai main hun haq ka aaina

shan-e-safa hai haal-e-nihan-o-'ayan mera

rahta hun chashm-e-ahl-e-basar ki nigah mein

milta hai nukta-dan ke suKHan mein nishan mera

zat-e-KHuda hai fahm mein wahm hai KHudi

'ilmul-yaqin samjho to haq hai guman mera

dair-o-haram mein bhul ke rakkha na main ne panw

sine mein ahl-e-dil ke hai jab se makan mera

main wo tilism-e-ghaib-o-shahadat hun ai 'watan'

sunta hun nam par nahin milta nishan mera