yar kan kan na phira dahr mein kya-kya ban kar

yaar kaañ kaañ na phirā dahr meñ kyā-kyā ban kar

āḳhirash baiTh gayā ḳhaak kā putlā ban kar

rah gayā thā jo adam meñ mirā naqsha ban kar

aayā ab ālam-e-ījād meñ ḳhāka ban kar

DhūñDe asrār-e-ḳhudā dil ne jo andhā ban kar

rah gayā aap hī pahlū meñ muamma ban kar

dekh lo ḳhuub mujhe aayā huuñ aisā ban kar

phir ye farmā.e koī jā.ūñgā kaisā ban kar

ban gayā zaḳhm-e-jigar dīda-e-bianā ban kar

dāġh-e-dil chamkā mirā arsh kā taarā ban kar

jisne dekhā mujhe hairat se vo muñh taktā rahā

maiñ bhī aayā huuñ jo duniyā meñ tamāsha ban kar

be-bahāne ke agar hai tumheñ aane meñ lihāz

ye lo ham marte haiñ tum aao masīhā ban kar

dam-e-kHuftan thā kisī rañg-e-tilā.ī kā ḳhayāl

uḌ ga.ī niiñd merī sone kī chiḌiyā ban kar

maiñ samajhtā thā ibādat ko hī asbāb-e-najāt

aatī hai sāmne har-dam mere duniyā ban kar

'ulvī' chhuTtā nahīñ jab tak ki na ushtur terā

aa.egā suuī ke naake meñ na dhāga ban kar

yar kan kan na phira dahr mein kya-kya ban kar

aaKHirash baiTh gaya KHak ka putla ban kar

rah gaya tha jo adam mein mera naqsha ban kar

aaya ab aalam-e-ijad mein KHaka ban kar

DhunDe asrar-e-KHuda dil ne jo andha ban kar

rah gaya aap hi pahlu mein muamma ban kar

dekh lo KHub mujhe aaya hun aisa ban kar

phir ye farmae koi jaunga kaisa ban kar

ban gaya zaKHm-e-jigar dida-e-biana ban kar

dagh-e-dil chamka mera arsh ka tara ban kar

jisne dekha mujhe hairat se wo munh takta raha

main bhi aaya hun jo duniya mein tamasha ban kar

be-bahane ke agar hai tumhein aane mein lihaz

ye lo hum marte hain tum aao masiha ban kar

dam-e-kHuftan tha kisi rang-e-tilai ka KHayal

uD gai nind meri sone ki chiDiya ban kar

main samajhta tha ibaadat ko hi asbab-e-najat

aati hai samne har-dam mere duniya ban kar

'ulwi' chhuTta nahin jab tak ki na ushtur tera

aaega sui ke nake mein na dhaga ban kar