payam-e-zer-e-lab aisa ki kuchh suna na gaya

payām-e-zer-e-lab aisā ki kuchh sunā na gayā

ishāra paate hī añgḌā.ī lī rahā na gayā

hañsī meñ vā'da-e-fardā ko Tālne vaalo

lo dekh lo vahī kal aaj ban ke aa na gayā

ḳharāb phirtā hai dīvānā kyuuñ bagūlā sā

zamīñ meñ sūrat-e-āb-e-ravāñ samā na gayā

pukārtā rahā kis-kis ko Dūbne vaalā

ḳhudā the itne magar koī aaḌe aa na gayā

samajhte kyā the magar sunte the tarāna-e-dard

samajh meñ aane lagā jab to phir sunā na gayā

karūñ to kis se karūñ dard nā-rasā kaar gila

ki mujh ko le ke dil-e-dost meñ samā na gayā

kahāñ kā kHanda-e-be-jā kahāñ kī zinda-dilī

kisī pe hañs liye itnā ki phir hañsā na gayā

butoñ ko dekh ke sab ne ḳhudā ko pahchānā

ḳhudā ke ghar to koī banda-e-ḳhudā na gayā

kirshn kā huuñ pujārī 'alī kā banda huuñ

'yagānā' shān-e-ḳhudā dekh kar rahā na gayā

payam-e-zer-e-lab aisa ki kuchh suna na gaya

ishaara pate hi angDai li raha na gaya

hansi mein wa'da-e-farda ko Talne walo

lo dekh lo wahi kal aaj ban ke aa na gaya

KHarab phirta hai diwana kyun bagula sa

zamin mein surat-e-ab-e-rawan sama na gaya

pukarta raha kis-kis ko Dubne wala

KHuda the itne magar koi aaDe aa na gaya

samajhte kya the magar sunte the tarana-e-dard

samajh mein aane laga jab to phir suna na gaya

karun to kis se karun dard na-rasa kar gila

ki mujh ko le ke dil-e-dost mein sama na gaya

kahan ka kHanda-e-be-ja kahan ki zinda-dili

kisi pe hans liye itna ki phir hansa na gaya

buton ko dekh ke sab ne KHuda ko pahchana

KHuda ke ghar to koi banda-e-KHuda na gaya

kirshn ka hun pujari 'ali ka banda hun

'yagana' shan-e-KHuda dekh kar raha na gaya