ye jahan bhi tu hai isko aaKHiri manzil bhi tu

ye jahāñ bhī tū hai is kī āḳhirī manzil bhī tū

bānī-e-mahfil bhī tū hai ḳhātim-e-mahfil bhī tū

bū-e-gul kā hai ta.alluq barg-e-gul se jis tarh

merī duniyā se alag bhī tū hai aur shāmil bhī tū

tujh se zāhir kī tajallī tujh se bātin kā subūt

shāhid-e-mahmil-nashīñ bhī hai tuuhī mahmil bhī tū

āsmānoñ par tirā jalva zamīñ par terā nuur

partav-e-mā'būd bhī tū banda-e-kāmil bhī tū

tū nazar meñ ho to tūfāñ kyā hai mauj-e-bahr kyā

qa.ar-e-dariyā meñ bhī tū hī hai sar-e-sāhil bhī tū

tū ma.āl-e-āshiqī hai tū kamāl-e-husn hai

sham.a-e-mahfil bhī hai tū parvāna-e-mahfil bhī tū

jis kī yazdāñ ko tamannā jis kī 'ālam ko talāsh

vo surūr-e-jāñ bhī tū hai vo sukūn-e-dil bhī tū

yā mohammad terā 'maikash' terī mahfil terā jaam

hāsil-e-mastī bhī tū hai mastī-e-hāsil bhī tū

ye jahan bhi tu hai is ki aaKHiri manzil bhi tu

bani-e-mahfil bhi tu hai KHatim-e-mahfil bhi tu

bu-e-gul ka hai talluq barg-e-gul se jis tarh

meri duniya se alag bhi tu hai aur shamil bhi tu

tujh se zahir ki tajalli tujh se baatin ka subut

shahid-e-mahmil-nashin bhi hai tuhi mahmil bhi tu

aasmanon par tera jalwa zamin par tera nur

partaw-e-ma'bud bhi tu banda-e-kaamil bhi tu

tu nazar mein ho to tufan kya hai mauj-e-bahr kya

qar-e-dariya mein bhi tu hi hai sar-e-sahil bhi tu

tu maal-e-ashiqi hai tu kamal-e-husn hai

shama-e-mahfil bhi hai tu parwana-e-mahfil bhi tu

jis ki yazdan ko tamanna jis ki 'alam ko talash

wo surur-e-jaan bhi tu hai wo sukun-e-dil bhi tu

ya mohammad tera 'maikash' teri mahfil tera jam

hasil-e-masti bhi tu hai masti-e-hasil bhi tu