ye tamanna hai ki is tarah musalman hota

ye tamannā hai ki is tarah musalmāñ hotā

maiñ tire husn pe sau jaan se qurbāñ hotā

ālam-e-josh-e-junūñ meñ jo adā hotī namāz

sar mirā sar kahāñ hotā dar-e-jānāñ hotā

kuchh tamannā hai to bas ye hai mohabbat meñ mujhe

mere hāthoñ meñ mere yaar kā dāman hotā

tū agar apnā banā letā mujhe mere sanam

kyuuñ mohabbat merā chāk-e-garebāñ hotā

sab karishma hai faqat rañg-e-duī kā varna

mazhab-e-pīr-e-muġhāñ mashrab-e-rindāñ hotā

na dikhāte mujhe jalva magar itnā karte

aap kā ġham mirī taskīn kā sāmāñ hotā

thaam kar maiñ tire dāman ko fanā ho jaatā

kaash is tarah mukammal mirā īmāñ hotā

ye tamanna hai ki is tarah musalman hota

main tere husn pe sau jaan se qurban hota

aalam-e-josh-e-junun mein jo ada hoti namaz

sar mera sar kahan hota dar-e-jaanan hota

kuchh tamanna hai to bas ye hai mohabbat mein mujhe

mere hathon mein mere yar ka daman hota

tu agar apna bana leta mujhe mere sanam

kyun mohabbat mera chaak-e-gareban hota

sab karishma hai faqat rang-e-dui ka warna

mazhab-e-pir-e-mughan mashrab-e-rindan hota

na dikhate mujhe jalwa magar itna karte

aap ka gham meri taskin ka saman hota

tham kar main tere daman ko fana ho jata

kash is tarah mukammal mera iman hota