yun to bande ka zamane mein hai banda aashiq

yuuñ to bande kā zamāne meñ hai banda 'āshiq

par ḳhudā bhī kahīñ hotā hai kisī kā 'āshiq

qais lailā pe to yūsuf pe zulaiḳhā 'āshiq

aap ke husn pe ḳhud ḳhāliq-e-yaktā 'āshiq

dast-e-anvar pe hue hazrat-e-mūsā 'āshiq

lab-e-jāñ-baḳhsh ke haiñ ḳhizr-o-masīhā 'āshiq

aap ke 'ishq se hotā hai mukammal īmāñ

hai vahī momin-e-kāmil jo hai sachchā 'āshiq

allāh allāh re vo sur’at-e-raftār-e-burrāq

huī bijlī bhī jo dekhā ye nazāra 'āshiq

qaus ne abrū-e-pur-ḳham kī balā.eñ le liiñ

māh-ruḳh-e-partav-e-jabīñ par huī zohra 'āshiq

'uqd par diiñ dur-e-dandāñ pe lagā karne nisār

ruḳh-e-anvar pe huā maah bhī aisā 'āshiq

mushtarī ko bhī huā zulf-e-nabī kā saudā

mehr ko mehr huā ho gayā ruḳh kā 'āshiq

dil se faa.iq kī tarah rū-e-nabī par ho nisār

hai 'abas gul pe tu ai bulbul-e-shaidā 'āshiq

yun to bande ka zamane mein hai banda 'ashiq

par KHuda bhi kahin hota hai kisi ka 'ashiq

qais laila pe to yusuf pe zulaiKHa 'ashiq

aap ke husn pe KHud KHaliq-e-yakta 'ashiq

dast-e-anwar pe hue hazrat-e-musa 'ashiq

lab-e-jaan-baKHsh ke hain KHizr-o-masiha 'ashiq

aap ke 'ishq se hota hai mukammal iman

hai wahi momin-e-kaamil jo hai sachcha 'ashiq

allah allah re wo sur’at-e-raftar-e-burraq

hui bijli bhi jo dekha ye nazara 'ashiq

qaus ne abru-e-pur-KHam ki balaen le lin

mah-ruKH-e-partaw-e-jabin par hui zohra 'ashiq

'uqd par din dur-e-dandan pe laga karne nisar

ruKH-e-anwar pe hua mah bhi aisa 'ashiq

mushtari ko bhi hua zulf-e-nabi ka sauda

mehr ko mehr hua ho gaya ruKH ka 'ashiq

dil se faiq ki tarah ru-e-nabi par ho nisar

hai 'abas gul pe tu ai bulbul-e-shaida 'ashiq