yun wo mahfil mein ba-sad shan bane baiThe hain

yuuñ vo mahfil meñ ba-sad shaan bane baiThe haiñ

merā dil aur mirī jaan bane baiThe haiñ

un kī sūrat nikhar aa.ī pas-e-zīnat kyā kiyā

dīda-e-kHalq kā armān bane baiThe haiñ

jin ko ādāb tak aate nahīñ darbānī aaj

aaj is dar pe vo darbān bane baiThe haiñ

mujh ko dekhā to ġhazabnāk hue TuuT paḌe

kyā ḳhabar thī ki vo tūfān bane baiThe haiñ

jo haiñ sultān vo phirte haiñ gadāoñ kī tarah

jo gadāgar haiñ vo sultān bane baiThe haiñ

mahfil-e-nāz meñ bulvā bhī liyā hai mujh ko

aur phir mujh se vo anjān bane baiThe haiñ

ahl-e-dil par vo ġhussa hai na vo qahr-o-sitam

ḳhair se aaj vo insān bane baiThe haiñ

dekhte hī nahīñ qasdan vo hamārī jānib

jaan kar ham se vo anjān bane baiThe haiñ

ai 'nasīr' un ko sar-e-bazm zarā dekho to

ik tamāsha kā vo unvān bane baiThe haiñ

yun wo mahfil mein ba-sad shan bane baiThe hain

mera dil aur meri jaan bane baiThe hain

un ki surat nikhar aai pas-e-zinat kya kiya

dida-e-kHalq ka arman bane baiThe hain

jin ko aadab tak aate nahin darbani aaj

aaj is dar pe wo darban bane baiThe hain

mujh ko dekha to ghazabnak hue TuT paDe

kya KHabar thi ki wo tufan bane baiThe hain

jo hain sultan wo phirte hain gadaon ki tarah

jo gadagar hain wo sultan bane baiThe hain

mahfil-e-naz mein bulwa bhi liya hai mujh ko

aur phir mujh se wo anjaan bane baiThe hain

ahl-e-dil par wo ghussa hai na wo qahr-o-sitam

KHair se aaj wo insan bane baiThe hain

dekhte hi nahin qasdan wo hamari jaanib

jaan kar hum se wo anjaan bane baiThe hain

ai 'nasir' un ko sar-e-bazm zara dekho to

ek tamasha ka wo unwan bane baiThe hain