zulm hota hai jafaon pe jafa hoti hai

zulm hotā hai jafāon pe jafā hotī hai

yuuñ adā rasm mohabbat kī adā hotī hai

kyā kahūñ hijr meñ hālat mirī kyā hotī hai

jān-levā shab-e-furqat kī balā hotī hai

phir to kuchh aur hī ho jaatā hai naqsha apnā

terī tasvīr jab āñkhoñ se judā hotī hai

nāz-o-andāz hasīnoñ ke liye zevar haiñ

dil-rubā hotī hai jo un kī adā hotī hai

rūh-parvar hai abhī bāda-e-ulfat lekin

aage chal kar yahī mia-hosh-rubā hotī hai

aur baḌh jaatī hai āshufta-sarī 'āshiq kī

sar se jab tā-ba-kamar zulf-e-rasā hotī hai

maut kā vaqt kisī tarh Tale nā-mumkin

aahī jaatī hai jab aane ko qazā hotī hai

kHūgar-e-zulm-o-jafā mujh ko banāyā thā magar

phir ye aġhyār pe kyuuñ mashq-e-jafā hotī hai

kushta-e-nāz kī turbat ye tire parda-nashīñ

ek halkī sī mohabbat kī ridā hotī hai

gar namāzoñ meñ nahīñ un kī huzūrī hāsil

phir to kā'be meñ adā ho to qazā hotī hai

jis se ho jaatī hai mahshar meñ qiyāmat barpā

terī pāzeb kī ghañgru kī sadā hotī hai

dil-e-muztar ke taḌapne se shab-e-furqat meñ

ik qiyāmat mire ghar roz bapā hotī hai

chal rahī haiñ tire andāz kī chhuriyāñ dil par

tujh se saffāk kahīñ terī adā hotī hai

jab vo aa jaate haiñ sajde ko maiñ jhuk jaatā huuñ

yuuñ hī har roz namāz apnī adā hotī hai

ruḳh-e-pur-nūr tasavvur meñ hai 'mohsin' un kā

isī sūrat se mire dil kī jilā hotī hai

zulm hota hai jafaon pe jafa hoti hai

yun ada rasm mohabbat ki ada hoti hai

kya kahun hijr mein haalat meri kya hoti hai

jaan-lewa shab-e-furqat ki bala hoti hai

phir to kuchh aur hi ho jata hai naqsha apna

teri taswir jab aankhon se juda hoti hai

naz-o-andaz hasinon ke liye zewar hain

dil-ruba hoti hai jo un ki ada hoti hai

ruh-parwar hai abhi baada-e-ulfat lekin

aage chal kar yahi mia-hosh-ruba hoti hai

aur baDh jati hai aashufta-sari 'ashiq ki

sar se jab ta-ba-kamar zulf-e-rasa hoti hai

maut ka waqt kisi tarh Tale na-mumkin

aahi jati hai jab aane ko qaza hoti hai

kHugar-e-zulm-o-jafa mujh ko banaya tha magar

phir ye aghyar pe kyun mashq-e-jafa hoti hai

kushta-e-naz ki turbat ye tere parda-nashin

ek halki si mohabbat ki rida hoti hai

gar namazon mein nahin un ki huzuri hasil

phir to ka'be mein ada ho to qaza hoti hai

jis se ho jati hai mahshar mein qiyamat barpa

teri pazeb ki ghangru ki sada hoti hai

dil-e-muztar ke taDapne se shab-e-furqat mein

ek qiyamat mere ghar roz bapa hoti hai

chal rahi hain tere andaz ki chhuriyan dil par

tujh se saffak kahin teri ada hoti hai

jab wo aa jate hain sajde ko main jhuk jata hun

yun hi har roz namaz apni ada hoti hai

ruKH-e-pur-nur tasawwur mein hai 'mohsin' un ka

isi surat se mere dil ki jila hoti hai