اجالا وہ ہے ایماں کا یہاں خواجہ وہاں خواجہ

اجالا وہ ہے ایماں کا یہاں خواجہ وہاں خواجہ

زمانہ بھر میں روشن ہے چراغِ چشتیاں خواجہ

تری شانِ کرامت ہے کہ یہ شانِ عبادت ہے

چلا آتا ہے چوکھٹ پر تری سَارا جہاں خواجہ

ملی ہے روشنی تجھ کو رسول اللہ کے در سے

ترے اس فیضِ نورانی کی حد ہے اب کہاں خواجہ

ترے روضہ پہ بارش رات دن پھولوں، درودوں کی

خدا کی خاص رحمت کا یہی تو ہے نشاں خواجہ

تو اس کا ہو گیا ایسا کہ دنیا ہو گئی تیری

ترے قبضہ میں اس نے دے دیا سارا جہاں خواجہ

تری روحانیت کے عالمِ بالا میں چرچے ہیں

ترے ہی ذکر سے گونجا ہوا ہے آسماں خواجہ

مروت ہے، محبت ہے، تواضع ہے، سخاوت ہے

تو ہے انسانیت کا ایک بحرِ بے کراں خواجہ

بہت مردِ خدا ہوں گے زمینِ ہند پر لیکن

کہاں خواجہ، کہاں خواجہ، کہاں خواجہ، کہاں خواجہ

یقیں کامِل ہے عارفؔ کو رہے گا دین و دنیا میں

ترے فضل و کرم کا اس کے سر پر سائباں خواجہ