ہو جائے عطا کچھ بہرِ خدا سلطان الہند غریب نواز

ہو جائے عطا کچھ بہرِ خدا سلطان الہند غریب نواز

مشہور سخی ہے نام ترا سلطان الہند غریب نواز

اس در کے گدا ہیں شاہ و گدا سلطان الہند غریب نواز

ہے سارے جہاں پر تیری عطا سلطان الہند غریب نواز

سرکار تیری وہ اعلیٰ ہے دربار تیرا وہ بالا ہے

گویا ہے زمیں پر عرش علا سلطان الہند غریب نواز

وہ بذل و سخا سرکار میں ہے شیراز کہوں اجمیر کو میں

دیگوں میں تیری یغما کا مزا سلطان الہند غریب نواز

مدہوش بھی ہو کر ہوش رہے ہر رنگ میں آئے وہ ہے نظر

اس مے کا ہو مجھ کو جام عطا سلطان الہند غریب نواز

امداد کرو امداد کرو یہ تو پڑا ہے دین پہ اب

اے میرے معین و عقدہ کشا سلطان الہند غریب نواز

تو بہرِ خدا روضہ سے نکل دیدار دکھا عشاق کو اب

پردے کو ہٹا لے رخ سے ذرا سلطان الہند غریب نواز

اقلیم ولایت میں تیری سب زیر نگیں ہیں اور ولی

مشہور جہاں ہے نام تیرا سلطان الہند غریب نواز

کس شمع رو کی تربت ہے جو سوز رشکِ الفت ہے

فانوس کا جس نے کام دیا سلطان الہند غریب نواز

بیدلؔ کو دیا جو تو نے دیا جو اس کو ملا وہ تجھ سے ملا

قربان ہوں، ہے سب تیری عطا سلطان الہند غریب نواز