اے خوشا تابانیٔ روئے معین الدین حسن

اے خوشا تابانیٔ روئے معین الدین حسن

جس سے پھوٹی ہند میں اسلام کی پہلی کرن

حسنِ اخلاق و نظر سے دل مسخر کر لیے

کر دیا ویران سینوں کو محبت کا چمن

دیکھ کر اندازِ تبلیغ مبارک کا کمال

بن گیے شیخِ حرم ہو کر مسلماں برہمن

قل ہواللہ احد کے نغمۂ توحید سے

آ گئی خود بت پرستوں میں ادائے بت شکن

واقعہ ہے کر کے ’’لا اکراہ فی الدیں‘‘ پر عمل

نوعِ انساں کو سکھائی راہ ربط جان و تن

اللہ اللہ فقر کی معراجِ اعلیٰ کا مقام

سر خمیدہ آج تک آتے ہیں شاہانِ زمن

مجھ کو بھی انورؔ ہے ان کی نسبتِ کامل پہ ناز

روح نے بخشی ہے جن کی مجھ کو تاثیرِ سخن

ظلِ عباس آج ہیں ان کے مقلد بالیقیں

تھا بحمداللہ جو کچھ میرے خواجہ کا مشن