مرے غوث الوریٰ جس دم کرم فرمانے لگتے ہیں

مرے غوث الوریٰ جس دم کرم فرمانے لگتے ہیں

تو گھر آئے لٹیرے بھی ولایت پانے لگتے ہیں

مئے توحید پینی ہے ہمارے ساتھ ہو جاؤ

ہمیں معلوم ہے کب قادری میخانے لگتے ہیں

ذرا سی بات پر یہ آسماں سر پر اٹھالیں گے

انہیں مت چھیڑیے یہ قادری دیوانے لگتے ہیں

ہمیں تو دور ہی سے دیکھ کے کہتی ہے یہ دنیا

یہ سب بغداد والی شمع کے پروانے لگتے ہیں

مرے غوث الوریٰ کا در تو ایسا در ہے جس در پر

شہنشاہِ زمانہ جھولیاں پھیلانے لگتے ہیں

ترے دیوانے کو پند و نصیحت کرتے ہیں جو غوث

مجھے وہ سارے فرزانے ہی خود دیوانے لگتے ہیں

زبان سے قم باذن اللہ جب فرماتے ہیں وہ نورؔ

تو مادر زاد کوڑھی بھی شفائیں پانے لگتے ہیں