خلاصہ پنجتن کا ہیں معین الدین و محی الدیں

خلاصہ پنجتن کا ہیں معین الدین و محی الدیں

مکمل فضلِ مولیٰ ہیں معین الدین و محی الدیں

نظر کی بات ہے اس کو نظر والے ہی سمجھیں گے

مرا قبلہ ہیں کعبہ ہیں معین الدین و محی الدیں

کوئی گوشہ نہیں ہے پرتوِ انوار سے خالی

یہاں بھی جلوہ فرما ہیں معین الدین و محی الدیں

یہ دو چشمے ہیں چشمانِ ولایت کی کرامت کے

درِ فیضانِ مولیٰ ہیں معین الدین و محی الدیں

خدائے پاک و بے ہمتا کی اک بے مثل قدرت کا

بڑا خاصہ نمونہ ہیں معین الدین و محی الدیں

ٹلی ہر ایک مشکل صرف ان کے نامِ نامی سے

بڑی قوت کے آقا ہیں معین الدین و محی الدیں

ہماری زندگانی ہے انہیں دونوں سے نسبت پر

سہارا سا سہارا ہیں معین الدین و محی الدیں

مہک پاتا ہوں ان دونوں میں عطرِ بو ترابی کی

مشامِ جاں کا سودا ہیں معیں الدیں و محی الدیں

سکونِ قلب خاصاں ہیں قرارِ جانِ پاکاں ہیں

نہ جانے کس کا جلوہ ہیں معین الدیں و محی الدیں

یہ دو ہاتھوں میں دو دامن ہیں کاملؔ حسنِ نسبت سے

ہمارے دونوں آقا ہیں معین الدین و محی الدیں